पेशावर, पाकिस्तान, असोज ६ गते । पाकिस्तान प्रहरी र सुरक्षा स्रोतले दुर्गम सीमा क्षेत्रमा सोमबार गरेको हवाई आक्रमणमा कम्तीमा २३ जना सर्वसाधारणको मृत्यु भएको जनाएको छ । विपक्षी सांसदहरूले सेनाले आतङ्कवाद विरोधी अभियान अन्तर्गत रातिमा छापा मारेको आरोप लगाएका छन् तर सरकार वा सशस्त्र बलले कुनै आधिकारिक वब्तब्य जारी गरी यस सम्बन्धमा औपचारिक भनाई सार्वजनिक गरेका छैनन् ।
पाकिस्तानी तालिबान (टिटिपी) लडाकूले हालैका महिनाहरूमा अफगानिस्तानसँग सीमा जोडिएको खैबर पख्तुनख्वा प्रान्तको पहाडी क्षेत्रमा सुरक्षा फौजविरुद्ध हिंसा अभियान बढाएका छन् । राष्ट्रिय सभाका विपक्षी सदस्य इकबाल अफ्रिदीले घटनाको पुष्टि गर्दै एएफपीसँग भन्नुभयो “सुरक्षा बलको विमानले गोलाबारी गरेको र यसबाट २३ जनाको मृत्यु भएको छ ।” सोमबार दिउँसो खैबर पख्तुन्ख्वाको विधानसभामा बोल्दै प्रान्तीय सांसद सोहेल खान अफ्रिदीले पनि आक्रमणका लागि सेनाको आलोचना गर्नुभएको छ ।
उहाँले भन्नुभयो, “सुरक्षाकर्मीको यो आक्रमण निहत्था नागरिकमाथिको आक्रमण भन्दा कम छैन ।” आक्रमणबारे प्रतिक्रया जनाउने दुवै सांसद जेलमा रहेका पूर्व प्रधानमन्त्री इमरान खानको पार्टीका सदस्य हुन् । खैबर पख्तुनख्वा प्रान्त खानको पार्टीको प्रभाव क्षेत्र हो । तिराह शहरमा तैनाथ एक वरिष्ठ प्रहरी अधिकारीले एएफपीसँग बताएअनुसार मारिने २३ जनामध्ये सात महिला र चार बालबालिका पनि थिए ।
नाम उल्लेख नगर्ने सर्तमा उहाँले भन्नुभयो, “जेटहरुले चारवटा घरलाई निशाना बनाएका छन्, जुन पूर्ण रुपमा ध्वस्त भएका थिए । “तिराह पाकिस्तान र अफगानिस्तान सीमाको नजिक छ र त्यहाँ धेरै टिटिपी लडाकूले गोप्यरूपमा शरण लिएको विश्वास गरिन्छ । हालैका महिनामा यस क्षेत्रमा सुरक्षा फौजमाथि धेरै आक्रमण भएका छन् ।
पेशावरका एक सुरक्षा अधिकारीले मृतकको सङ्ख्या पुष्टि गर्दै उक्त क्षेत्रमा ‘टिटिपी लुकेका दर्जनौँ स्थान’ रहेको बताएका छन् । उहाँले आक्रमण कसले गरेको हो भन्ने कुरा पनि बताउन अस्वीकार गर्नुभयो । सोमबार दिउँसो करिब दुई हजार मानिस नजिकैको शहरमा घातक आक्रमणको विरोधमा भेला भएका थिए । सन् २०१४ मा सुरु भएको आतङ्कवाद विरोधी अभियानअघि टिटिपीले अफगानिस्तानसँग सीमा जोडिएको भूभाग कब्जा गरेको थियो ।
शनिबार छिमेकी जिल्लामा भएको आक्रमणमा १२ जना सैनिकको मृत्यु भएको थियो । सेनाले सोमबार अबेर प्रकाशित एक विज्ञप्तिमा भनेको छ, सैनिक कारबाहीमा सप्ताहन्तमा ३१ ‘ख्वारिज’ को मृत्यु भएको छ । ‘ख्वारिज’ सेनाले टिटिपी लडाकुलाई वर्णन गर्न प्रयोग गर्नेे शब्द हो । रासस/एएफपी
