काठमाडौं, भदौ १४ गते । ओखलढुंगाका अग्रज पत्रकारहरूले पत्रकारिता जति अभ्यास गर्यो त्यति राम्रो हुने बताउनु भएको छ । उहाँहरूले नेपालको साहित्य र पत्रकारिताको राष्ट्रिय विकासमा पनि ओखलढुंगामा जन्मेका स्रष्टा तथा पत्रकारको योगदान महत्वपूर्ण रहेको औंल्याउनु भयो ।
ओखलढुंगामा जन्मेर काठमाडौं उपत्यका तथा अन्य स्थानमा पत्रकारिता गर्दै आएका सञ्चारकर्मीहरूको संस्था ‘ओखलढुंगा पत्रकार समाज’ ले शनिबार यहाँ आयोजना गरेको प्रथम साधारण सभा तथा ‘ओखलढुंगाको इतिहास र वर्तमान अवस्था’ विषयक कार्यकममा बोल्ने वक्ताहरूले यस्तो विचार राख्नु भएको हो ।
वरिष्ठ पत्रकार तथा प्राध्यापक पुरुषोत्तम दाहालले भन्नुभयो, ‘‘पत्रकारिताको अभ्यास जति ग¥यो त्यति राम्रो हुन्छ, पत्रकारले अन्तिम सास हुँदासम्म स्वतन्त्रता खोज्छ, पत्रकार स्वतन्त्रताका अभियान्ता हुन्, पत्रकारितालाई निष्ठापूर्ण बनाउनु पर्छ तर त्यो कुरा कठिन कुरा हो ।’’
प्रेस काउन्सिलका पूर्व अध्यक्ष राजेन्द्र दाहालले भूगोलप्रतिको माया लाग्दो रहेछ, त्यसैले भूगोलमा पवित्रता छ भन्दै नेपालको पत्रकारितामा विसं. २०३० देखि २०५० को अवधिमा वरिष्ठ पत्रकार होमनाथ दाहालको योगदान विशिष्ट रहेको उल्लेख गर्नुभयो । कार्यक्रममा समाजका उपाध्यक्ष एवम् गोरखापत्रका डिजिटल प्रमुख नारद गौतमले ‘ओखलढुंगाको पत्रकारिताको इतिहास र वर्तमान अवस्था’ विषयमा कार्यपत्र प्रस्तुत गर्दै ओखलढुंगामा मौखिक तथा हस्तलिखितबाट सुरु भएको साहित्य एवम् पत्रकारिता अहिले डिजिटल युगमा प्रवेश गरेको चर्चा गर्नुभयो ।
उहाँको कार्यपत्रमा हस्तलिखित ‘जूनकिरी’ साहित्यिक पत्रकारिता सुरु गर्ने भीमप्रसाद श्रेष्ठ रहेको र यो नेपालमा दर्ता भएको पहिलो हस्तलिखित पत्रिका भएको, अंग्रेजी र नेपाली भाषा प्रकाशित ‘ऊ’ को सम्पादक अनिता राजभण्डारी रहेको उल्लेख छ । त्यस्तै, प्रेम नारायण प्रेमीको ‘दैलो’ ओखलढुंगामा २०२१ मा दर्ता भई प्रेसबाट छापिएको चर्चा गर्दै ओखलढुंगामा जन्मेका युगकवि सिद्धिचरण श्रेष्ठले आफैं सम्पादक/प्रकाशक भएर नेपालको पहिलो दैनिक अखबार ‘आवाज’ प्रकाशन गरेको उल्लेख छ । पत्रकारिताको सबैभन्दा लामो र व्यावसायिक अभ्यास गर्ने पत्रकार होमनाथ दाहाल रहेको र त्यसपछि ओखलढुंगाले धेरै पत्रकार जन्माएको विवरण गौतमले प्रस्तुत गर्नुभयो ।
ओखलढुंगामा पत्रिका प्रकाशन गर्ने र बन्द गर्ने क्रम जारी रहेको देखियो । ओखलढुंगामा दर्ता भई प्रकाशन भएका साप्ताहिक र मासिक पत्रिकाहरूमा दैलो, ओखलढुंगा आवाज साप्ताहिक, ओखलढुंगा साप्ताहिक, लेकबेसी साप्ताहिक, ओखलढुंगा टाइम्स, सार्वजनिक साप्ताहिक, भिजन नेपाल साप्ताहिक ९हाल सञ्चालनमा रहेको०, समृद्ध साप्ताहिक, ओखलढुंगा सन्देश मासिक, चासिवा मासिक, सगरमाथा बिम्ब मासिक, थुँगा मासिक छन् ।
यसैगरी, प्रसारणमा रहेका रेडियोहरुमा भिजन एफएम, आफ्नो एफएम, रेडियो ओखलढुंगा, सहयात्री रेडियो रहेका र रमाइलो रेडियो ९हाल बन्द० छ । डिजिटल पत्रकारितातर्फ ओखलढुंगा खबर अनलाइन, नागरिक मिडिया अनलाइन, स्क्रीन खबर अनलाइन, झगन खबर अनलाइन, नेपाल विचार अनलाइन र ओखलढुंगा न्युज अनलाइन सञ्चालनमा छन् । ओखलढुंगामा जन्मेर विभिन्न जिल्लामा बसेर छापा, रेडियो, टेलिभिजन र अनलाइन मिडिया सञ्चालन गर्ने सञ्चारकर्मीको सङ्ख्या उल्लेख्य रहेको जानकारी दिइयो ।
समाजका अध्यक्ष चेतनाथ धमलाको अध्यक्षतामा भएको कार्यक्रममा नेपाल पत्रकार महासंघका पूर्व कार्यवाहक अध्यक्ष बाला कार्की, अग्रज पत्रकारहरू जीवनाथ धमला, बालकुमार नेपाल, हरिप्रसाद ढुगेल तथा पत्रकारहरू शिव सत्याल, टीकाराज श्रेष्ठ, लीला श्रेष्ठ, नारायण घिमिरे, सुमन लुइटेल, सलोजा दाहाल, जीवन शर्मालगायतले विभिन्न विषयमा चर्चा गर्नुभयो ।
