श्रीनगर, भदौ १४ गते । भारतको जम्मु र कश्मीर क्षेत्रमा अत्यधिक वर्षा भएको कारण आएको बाढीले कम्तीमा ११ जनाको ज्यान लिइसकेको छ, जसमा चार बालबालिका पनि छन् । पछिल्ला दिनमा परेको भारी वर्षाले रामबन र रियासी जिल्लामा बाढीको स्थिति सिर्जना गर्यो, जसमा ५ वर्षका एक बालक अझै बेपत्ता छन् ।
स्थानीय आपतकालीन अधिकारीका अनुसार शुक्रबार राति बाढी र माटोको धसावले ती क्षेत्रमा ठुलो क्षति पुर्यायो । भारतको मौसम विभागका अनुसार जम्मु र उधमपुरमा २४ घण्टामा २९६ मिलिमिटर र ६२९ मिलिमिटर वर्षा भएको छ, जुन विगतका रेकर्डभन्दा धेरै बढी हो ।
बाढी र माटोको धसाव जस्ता घटना सामान्यतः जुनदेखि सेप्टेम्बरसम्मको वर्षा याममा हुन्छन्, तर विशेषज्ञले जलवायु परिवर्तन र अत्यधिक निर्माण कार्यका कारण यस किसिमका घटनाको जोखिम बढेको चेतावनी दिएका छन् । हिमालय क्षेत्रमा केन्द्रित अन्तर्राष्ट्रिय पर्वतीय विकास केन्द्रका जलवायु विशेषज्ञका अनुसार, अत्यधिक वर्षा र हिमालयका ढल्किएका पहाडमा निर्माण कार्यले बाढीको जोखिमलाई थप बढाएको छ ।
अघिल्लो महिना, १४ अगस्तमा चिसोटी गाउँमा बाढीका कारण कम्तीमा ६५ जनाको ज्यान गएको थियो भने ३३ जना अझै बेपत्ता छन् । ५ अगस्तमा उत्तराखण्ड राज्यको धाराली नगरमा पनि बाढी र माटोको धसावले ठुलो क्षति पुर्याएको थियो, जसका कारण ७० जनाभन्दा बढीको मृत्यु भएको अनुमान गरिएको छ, यद्यपि यो तथ्याङ्क पुष्टि गरिएको छैन । रासस/एएफपी
