शेरबहादुर सार्की
बाजुरा, भदौ १४ गते । बाजुराको बडिमालिका नगरपालिका वडा नं.–७ को जिल्ली गाउँ अहिले पहिरोको उच्च जोखिममा परेको छ ।
गत शुक्रबार राति आएको अविरल वर्षातका कारण गाउँको मुनीबाट पहिरो बग्न थालेपछि अहिले जिल्ली गाउँ पहिरोको उच्च जोखिममा परेको हो ।पहिरोेले गाउँलाई जोखिम पारेपछि अहिले यहाँका झण्डै बीस परिवारलाई राति कहाँ गएर बास बस्ने भन्ने चिन्ता सुरु भएको छ ।
तलबाट गाउँमा पहिरो पुगेको छ । त्यो पहिरो कति बेला गाउँ पुग्छ केही थाहा छैन् । पहिरो यस्तै गरी बग्दै जाने हो भने कुन राति घरमा सुतिरहेको बेला हामीलाई समेत लाने होकी भन्ने डरले उनीहरूको चिन्ता सुरु भएको हो ।
मार्तडी–कोल्टी सडक पनि जिल्लाको गाउँ मुनि रहेको छ । पहिला त्यो सडक खन्ने बेलामा नै गाउँ थर्किए हो । गाउँमा अहिले थोरै पानी परे पनि पहिरो लाग्न थालेकोे जिल्लीका स्थानीय बताउँछन् ।
यसरी गाउँको तल देखि पहिरो जाने गरेकोले अहिले यहाँ झण्डै २० घर निकै जोखिमा रहेका छन् । ती मध्ये आठ घर त तत्काल अन्य सुरक्षित स्थानमा स्थानान्तरण गर्नु पर्ने देखिएको बडिमालिका नगरपालिका–७ वडाध्यक्ष धर्मराज पाध्यायको बताउनुभयो ।
उहाँले भन्नुभयो, “पहिरोले यहाँको लक्ष्मि मावि पहिला नै जोखिममा परेको थियो । शुक्रबार राती परेको पानीका कारण अहिले त्यो पहिरो गाउँमा पुगेसँगै जिल्लीको गाउँ पनि जोखिमा रहेको छ ।”
यहाँ प्राय भदौमा बढी पानी पर्छ । त्यो पानीले फेरि पहिरो जान्छ । यसरी पहिरो बग्दै गरेपछि कति बेला यो जिल्लीको गाउँ नै पुरै पहिरोमा परिणत हुने केही थाहा नभएको वडाध्यक्ष पाध्याले बताउनुभयो ।
अविरल वर्षाका कारण जिल्ली गाउँ मुनि पहिरो जान थालेपछि अहिले यहाँका स्थानीयलाई सुरक्षित स्थानमा सार्ने तयारी भएको जिल्ला प्रशासन कार्यालय बाजुराका प्रमुख जिल्ला अधिकारी गणेश पौडेलले बताउनुभयो ।
