नयाँ दिल्ली, भदौ १४ गते । अमेरिकाले भारतबाट आयात हुने थुप्रै वस्तुमा ५० प्रतिशतसम्म भन्सार शुल्क लगाउने निर्णय गरेपछि भारतका वाणिज्यमन्त्री पियुष गोयलले नयाँ दिल्लीमा शुक्रबार आयोजित एक कार्यक्रममा बोल्दै भन्नुभयो, “भारत सधैँ निष्पक्ष र सम्मानजनक व्यापारमा विश्वास राख्छ । तर हामी कहिल्यै झुक्दैनौं, न त कमजोरी देखाउँछौँ ।”
उहाँका अनुसार भारतले अन्तर्राष्ट्रिय बजारमा नयाँ सम्भावनाको खोजी गर्दै विश्वव्यापी निर्यात विस्तारमा केन्द्रित हुने छ । उक्त भन्सार शुल्क अमेरिकाले भारतले रुसबाट आयात गर्ने कच्चा तेललाई कारण देखाउँदै लगाएको हो । यो कदमसँगै भारत-अमेरिका व्यापार सम्बन्धमा केही तनाव देखिएको छ ।
भारतले यसअघि नै ती शुल्कलाई ‘अन्यायपूर्ण र अविवेकी’ भन्दै असहमति जनाएको थियो । अहिले दुबै मुलुकबिच कृषि र डेरी क्षेत्रको पहुँचबारे भएको व्यापार वार्ता पनि निष्कर्षमा पुग्न सकेको छैन । अमेरिकी राष्ट्रपति डोनाल्ड ट्रम्प अमेरिकी उत्पादनलाई भारतीय बजारमा बढी पहुँच दिन चाहन्छन् भने भारतीय प्रधानमन्त्री नरेन्द्र मोदीले देशका किसानको हित जोगाउन प्राथमिकता दिनुभएको छ ।
सन् २०२४ मा अमेरिका भारतको सबैभन्दा ठुलो निर्यात गन्तव्य बनेको थियो, जहाँबाट ८७ अर्ब अमेरिकी डलरभन्दा बढीको वस्तु निर्यात गरिएको थियो । विश्लेषकहरु यति ठुलो भन्सार शुल्कले खास गरी साना उद्योग र निर्यातकर्तालाई गम्भीर असर पार्न सक्ने बताउनुभयो ।
पहिले नै कपडा, गहना र समुद्री उत्पादन निर्यात गर्ने व्यवसायीले अमेरिकी अर्डर रद्द भएको र प्रतिस्पर्धी राष्ट्र जस्तै बङ्गलादेश तथा भियतनामले त्यसको फाइदा उठाएको बताउनुभयो । मन्त्री गोयलले सरकार चाँडै नै सबै क्षेत्रका निर्यातकर्तालाई सहयोग गर्ने विशेष योजना ल्याउन लागेको जनाउनुभयो । उहाँले भन्नुभयो,“म विश्वस्त छु, चालु वर्षमा भारतको निर्यात अघिल्लो वर्षको तुलनामा अझ बढ्ने छ ।” रासस/एएफपी
