सिराज खान
नेपालगन्ज, भदौ ८ गते । बाँकेका थारु बाहुल्य गाउँबस्तीमा आइतबार अट्वारी पर्व धुमधामका साथ मनाइदै छ । यो पर्वलाई भव्य रुपमा मनाउन गत केही दिनदेखि थारु समुदायमा तयारी तीव्र पारिएको थियो ।
महाभारतका प्रमुख पात्र पाँच पाण्डवमध्येका माइलो भाइ भीमको श्रद्धापूर्वक पूजा गर्ने सबै तयारी पूरा गरिएको र आइतबार आफन्तजनसँग मिलेर पूजा गर्ने राप्ती सोनारीका हेमन्त चौधरीले बताउनुभयो ।
उहाँले आइतबार अधिकांश थारु समुदायका पुरुषहरु दिदीबहिनीका लागि व्रत बसेको पनि बताउनुभयो ।
यस्तै नेपालगन्जका अर्का थारु अगुवा भगतराम थारुले अट्वारी विशेषगरी दुई दिन मनाउने जनाउँदै आइतबार दिनभरी व्रत बसेर फलफूल र रोटीका परिकार बनाउने तथा सोमबार बिजोडी थरिथरिका तरकारीलगायत खानेकुरा पकाइने बताउनुभयो ।
सोही प्रकारले बाँके बिनौनाका थारु अगुवा बिमला चौधरीले दाइभाइले दिदीबहिनीप्रतिको स्नेह दर्शाउने विशेष अवसर नै अट्वारी पर्व भएकाले आफुहरुले वर्षभरी यसको प्रतिक्षा गर्ने बताउनुभयो । उहाँले परिवारभित्र सद्भाव, एकता र सम्बन्ध सुदृढ पार्ने पर्वका रूपमा पनि ‘अटवारी’ लाई लिइने गरिएको बताउनुभयो ।
बाँके मैटहवाका थारु अगुवा दिपेन्द्र चौधरीका अनुसार थारु समुदायमा रहँदै आएको प्रचलित किंवदन्ती अनुसार कुनै बेला भेवा (भीम) घुम्दै जाँदा तराई (थारु बसोबास गरेको ठाउँ) मा पुगेका थिए । सो किंवदन्ती अनुसार उक्त तराई क्षेत्रमा एउटा राक्षसले उत्पात मच्चाउने, दुःख दिने, चेलीहरूमाथि जबरजस्ती गर्ने कामलाई तीव्रता दिएका थिए । ती सबै समस्याबाट भीमले मुक्त गरेको हुँदा उनको सम्झनामा अट्वारी पर्व मनाउने प्रचलन थारु समुदायमा रही आएको छ ।
उहाँले व्रत लिएर आइतबार बेलुका पूजाको काम सकिएपछि छोरी, दिदीबहिनीका लागि खानाको परिकार ‘अग्रासन’ छुट्याइने बताउनुभयो ।
त्यही परिकार लिएर दाजुभाइ विवाहिता दिदीबहिनीलाई भेट्न उनीहरूकै घर जानेछन् । अग्रासनलाई दिदीबहिनीले अत्यन्त महत्त्वका साथ लिने गरेको थारु अगुवाहरको भनाइ छ । अट्वारी पर्व नारी सम्मान र दिदि बहिनीको माया सम्बन्धलाई प्रगाढ बनाउने पर्वका रुपमा पनि स्थापित भएको छ ।
