बागलुङमा थपिए ३१ पदमार्ग

रामकृष्ण बोहरा
बागलुङ, साउन २२ गते । पर्यटन प्रवर्धन गर्ने उद्देश्यसहित गत वर्ष बागलुङमा ३१  पदमार्ग निर्माण गरिएको छ । उद्योग तथा पर्यटन कार्यालय बागलुङले आर्थिक वर्ष २०८१/०८२ मा ३१ वटा पदमार्ग निर्माण गरेको हो ।

कतिपय स्थानमा बनेका पदमार्गका कारण पर्यटकीय गतिविधि र होमस्टे सञ्चालन गर्न सहज भएको छ भने धार्मिक पर्यटक बढाउने बागलुङको उपल्लाचौरस्थित गौरीधाम मन्दिर परिसरमा कार्यालयले पार्क समेत निर्माण गरिदिएको छ ।

ताराखोला गाउँपालिका– २ मा निर्माण भएको सहिद स्मृति पार्क मा कार्यालयले १५ लाख लगानी गरेको छ । सशस्त्र द्वन्द्वको इतिहास पनि यो पार्कले समेटेको वडा नंं २ का अध्यक्ष भद्रबहादुर घर्तीले बताउनुभयो । ताराखोलाकै वडा नंं. १ स्थित गाईघाट झरनाको संरक्षणमा पर्यटन कार्यालयले २० लाख खर्चेपछि पालिका र वडाको समेत लगानीले आर्कषक पर्यटकीय गन्तव्य बनेको छ ।

उद्योग तथा पर्यटन कार्यालयका अधिकृत छैठौं नारायण रिजालका अनुसार, गलकोट नगरपालिका–५ को हरिचौरदेखि सिमलचौर र अन्तर्राष्ट्रिय मूर्तिकलासम्म पुग्ने पदमार्ग, गलकोटकै वडा नंं. ३ स्थित कोतघर जाने पदमार्ग, बागलुङ नगरपालिका–८ को सिगानास्थित रानीभुमेसम्म पुग्ने पदमार्ग र ढोरपाटन नगरपलिका–१ को भवरेटा जाने पदमार्गले आन्तरिक पर्यटकका लागि आर्कषक गन्तव्य बन्न थालेका छन् ।

स्थानीयको माग र आवस्यकताको आधारमा पदमार्ग निर्माण गरिएको हो । बागलुङ नगरपालिका–१३ पैयुपाटादेखि वडा नंं. १२ को भैरवस्थान पुग्ने पदमार्ग निर्माणले भक्तजनलाई सहज भएको छ । कार्यालयले गत आर्थिक वर्षमा दुई करोड ९० लाख खर्चेर ३१ वटा पदमार्ग बनाएको अधिकृत रिजालले जानकारी दिनुभयो ।  

त्यस्तै, पाँच लाख खर्चेर पार्क, ९० लाख खर्चेर नौ वटा पूर्वाधारका योजना पनि बनाइएको हो । पर्यटन तथा उद्योग कार्यालयले १० लाखदेखि २० लाख रुपियाँसम्म खर्चेर अघिल्लो वर्ष ५३ वटा पदमार्ग बनाएको थियो । ती पदमार्ग उपयोगी देखिएपछि गत वर्षपनि ३१ वटा पदमार्ग बनाएको हो । बागलुङको भिरलाकुरी पदमार्ग, भकुण्डेको एक्लेसालदेखि निफन्नी पदमार्ग, निसीखोला गाउँपालिका वडा नं. ७ को नरसिंहकोट पर्यटकीय स्थल जाने पदमार्गले गन्तव्यमा जाने बाटो छोटो बनाएको छ भने पर्यटकीय क्षेत्रमा चहलपहल पनि बढाएको छ । 

कार्यालयमार्फत आर्थिक वर्ष २०८०/०८१ मा मात्रै ७६ वटा पर्यटन पूर्वाधारका योजना सम्पन्न गरेको थियो । जिल्लाका दशवटै स्थानीय तहका धार्मिक मठमन्दिर, भञ्ज्याङ, देउराली लगायतमा पुग्नेगरी ती पदमार्ग बनेका हुन् । त्यसबाहेक दुइवटा बौद्द गुम्बाको ध्यान केन्द्र निर्माण गरिएको रिजालले बताउनुभयो ।

पञ्चकोट, घुम्टे, गौरीधाम, तित्याङस्थित आशापुणेश्वर शिवालय मन्दिर र निलुवा लेकमा पूर्वाधार निर्माण गरिएको छ । ताराखोलाले निर्माण गरेको सहिद स्मृति पार्कमा कार्यालयले १५ लाख लगानी गरेको छ । गलकोटकै वडा नंं. ११ को रिघास्थित उदय रिघा बुद्द बिहार मर्मत र पदमार्गका लागि कार्यालयले १५ लाख लगानी गरेको अधिकृत रिजालले जानकारी दिनुभयो ।