मस्को, असार ३१ गते । युक्रेनी सेनाहरू माथि जासुसी गरेर मस्कोको सैन्य आक्रमणलाई सहयोग गर्ने एक अमेरिकीलाई रुसी नागरिकता प्रदान गरिएको मस्को-स्थापित अधिकारीहरूले मङ्गलबार बताएका छन् । रुसी राज्य मिडियाका रिपोर्टहरूका अनुसार डेनियल मार्टिनडेलले रुसले आक्रमण सुरु गरेपछि युक्रेनमा दुई वर्ष बिताए र रुसका गुप्तचर सेवाहरूलाई सैन्य सुविधाहरूको निर्देशाङ्कहरू पठाए ।
“हाम्रा राष्ट्रपति भ्लादिमिर पुटिनको आदेशद्वारा रूसी सङ्घको एक नागरिकको पासपोर्ट डेनियल मार्टिनडेललाई प्रदान गरिएको छ”, युक्रेनको डोनेट्स्क क्षेत्रको रूसी–कब्जा गरिएको भागका प्रमुख डेनिस पुसिलिनले टेलिग्राममा भन्नुभयो, “मार्टिनडेलले लामो समयदेखि आफ्नो वफादारी र कार्यहरूद्वारा प्रमाणित गरे कि उनी हामीमध्ये एक हुन् ।”
“उनले शत्रुको नियन्त्रणमा रहेको क्षेत्रमा दुई वर्षभन्दा बढी बिताए र उनले मात्र बाँच्ने काम मात्र नगरेर सहयोग गरे । उनले हाम्रा केटाहरूलाई सहयोग गरे, हाम्रा विशेष सेवाहरूलाई महत्त्वपूर्ण जानकारी पठाए, आफ्नो जीवन जोखिममा राखे”, पुसिलिनले भन्नुभयो । पुसिलिनले प्रकाशित गरेको भिडियो र राज्य सञ्चार माध्यमका अनुसार मार्टिनडेलले मस्कोमा आयोजित एक समारोहमा आन्तरिक मन्त्रालयका अधिकारीहरूबाट पासपोर्ट प्राप्त गरेका थिए ।
मार्टिनडेलले रुसलाई ‘मलाई स्वीकार गरेको’ मा धन्यवाद दिए र रुसी नागरिक बन्नु एक ‘सपना’ भएको बताए । उनले भिडियोमा रुसी भाषामा भने, “रुस मेरो घर मात्र नभएर मेरो परिवार हो ।” युक्रेनमा दुई वर्ष जासुसी गरेपछि, मस्कोले उनी त्यहाँ बढी समय बसे भने उनको ज्यान जोखिममा पर्न सक्छ भन्ने डर गरेपछि उनलाई ‘एक जटिल निकासी अपरेशन’ मा बाहिर निकालिएको पुसिलिनले बताउनुभयो ।
सन् २०२४ नोभेम्बरमा राज्य मिडियाले रूसी सुरक्षा बलले उनलाई रुस लगेको र मार्टिनडेलले रूसी नागरिकताका लागि आफ्नो आवेदन दर्ता गरेको रिपोर्ट गरेको थियो । उनको भनिने टेलिग्राम खाताले सोही महिना पोस्ट गरेको थियो, “नमस्ते, म डेनियल मार्टिनडेल हुँ, त्यो केटा जसलाई रुसी सैनिकहरूले आफ्नो जीवन जोखिममा राखेर मैले दुई वर्ष बसेको गाउँबाट निकालेका थिए ।” रासस/एएफपी
