प्रकाशविक्रम शाह
धनगढी, असार ११ गते । बाजुराको बुढीगंगा नगरपालिकाको नाम परिवर्तन हुने भएको छ । सो नगरपालिका अब बार्जु नगरपालिकामा परिणत हुने भएको हो । मङ्गलबार बुढीगंगाको १२ औं नगर अधिवेशन (सभा)ले सो निर्णय गरेको हो ।
सङ्घीय बजेट र पत्राचारमा जहिले नाम जुधेर समस्या हुने गरेको थियो त्यसैले नाम परिवर्तनको निर्णय गरेका हौ नगर प्रमुख रामबहादुर बाँनियाले बताउनुभयो ।
नगरपालिकाको नाम छोटोमा लेख्दा बुनपा हुने त्यसो हुँदा बाजुराकै बुढीनन्दा नगरपालिकादेखि कोशी प्रदेशको मोरडको बुढीगंगा गाउँपालिकासम्म जुध्ने गरेको थियो ।
बुढीगंगाका लागि मागिएको बजेट बुढीनन्दामा गएकाले आग्रह गरेर हामीले आफ्नोमा फिर्तासम्म गराउनु परेका उदाहरण छन् नगर प्रमुख बाँनियाले बताउनुभयो ।
नगरसभाले निर्णय गरेपछि सुदूरपश्चिम प्रदेश सरकार र सङ्घीय सरकारबाट आवश्यक प्रक्रिया पूरुा गर्ने गरेर पहल गरिने उहाँले बताउनुभयो ।
बुढीगंगा नगरपालिका साविकका बाह्रविस, ब्रहमतोला र कुल्देमाडौ गाविस मिलेर बनेको छ । बुढीगंगामा १० वडा रहेका छन् ।नाम परिवर्तन गर्नका लागि जेठका अन्तिम साता भएको कचहरीले समेत सल्लाह दिएको थियो । सो कचहरीमा उपस्थित प्रमुख दल नेकपा (एमाले) , नेपाली कांग्रेस, नेकपा (एकीकृत समाजवादी) र नेकपा (माओवादी केन्द्र) का मुख्य नेताहरुले नै नाम बुढीगंगाको नाम परिवर्तन गरेर बार्जु वा बार्जुकोट राख्न सुझाव दिएका थिए ।
