साहारा लिम्बु
फुङलिङ, जेठ ९ गते। ताप्लेजुङको मेरिङदेन गाउँपालिकामा करेन्ट लागेर १० ओटा पशु चौपाया मरेका छन्।शुक्रबार दिउँसो थिङलाबुको थुङथापस्थित खुवागुमा करेन्ट लागेर स्थानीय विजय एभेङ लिम्बूका १० ओटा पशु चौपाया मरेका छन्।
थिङलाबुका वडाध्यक्ष सबिन लिम्बुका अनुसार दिउँसो जङ्गलमा चराएर गोठतर्फ लाने क्रममा करेन्ट लागेको थियो।करेन्ट लागेर एभेङको एक हल गोरु, दुई ओटा गाई र ६ ओटा बाख्रा मरेको वडाध्यक्ष लिम्बूको भनाइ छ।
बिजुलीको तारले पोलमा छोएर जमिनमा प्रवाह भएको करेन्ट लागेर पशुचौपायाको मरेको स्थानीयले बताएका छन्।यता प्रहरीको टोलीले घटनाको विषयमा अनुसन्धान जारी राखेको बताएका छन्।
नेपाल विद्युत प्राधिकरण ताप्लेजुङ वितरण केन्द्रका अनुसार सो क्षेत्रमा थिङलाबु विद्युत सहकारी संस्थामार्फत विद्युत सञ्चालनमा रहेको छ।जसको रेखदेखको जिम्मा सबै सहकारीकै हुने केन्द्रले जनाएको छ।अहिले सो क्षेत्रमा विद्युत कटौती गरेको समेत केन्द्रले जनाएको छ।
