बैतडी समाचारदाता
बैतडी, जेठ ९ गते । तराई/मधेशका कृष्णऔतार चौधरी २५० किलोमिटर टाढा पहाडी जिल्ला बैतडी पुगेर युवालाई फर्निचरसम्बन्धी सिप सिकाउँदै आउनुभएको छ । प्राविधिक शिक्षा तथा व्यावसायिक तालिम परिषद् (सिटिइभिटी) बाट फर्निचर मेकरको तह दुई उत्तीर्ण गर्नुभएका चौधरी विगत पाँच वर्षदेखि पहाडी जिल्लाका विभिन्न ठाउँमा पुगेर युवालाई सिप सिकाउँदै आउनुभएको छ ।
कैलारी गाउँपालिका–८, कैलालीका स्थायी बासिन्दा कृष्णऔतार चौधरी यो पटक दशरथ चन्द नगरपालिकाले आयोजना गरेको सिकर्मी तथा काष्ठकलासम्बन्धी तालिम दिन एक महिनादेखि बैतडी सदरमुकाममा हुनुहुन्छ । यसअघि उहाँले बैतडीको पाटन नगरपालिका–८, खोड्पेमा प्रदेश सरकारको सहयोगमा फर्निचरसम्बन्धी तालिम दिइसकेको बताउनुभयो ।
यो पटक उद्योग वाणिज्य तथा आपूर्ति मन्त्रालय अन्तर्गत उद्योग प्रवर्धन महाशाखाको आर्थिक सहयोगमा दशरथ चन्द नगरपालिकाले सञ्चालन गरेको फर्निचरसम्बन्धी तालिममा २० जना युवालाई सिप सिकाइरहनुभएको छ । नगरपालिकाले फर्निचरसँगै बाँसजन्य वस्तुको सिप र छाला प्रशोधन गरी प्रविधि केन्द्र स्थापना गर्न तालिम चलिरहेको दशरथ चन्द नगरपालिकाको रोजगार शाखा प्रमुख नन्दराज जोशीले बताउनुभयो ।
