अजय शाह
गौशला (महोत्तरी, जेठ २ गते । प्रादेशिक अस्पताल जलेश्वरमा निःशुल्क रूपमा वितरण हुने औषधिको चरम अभाव भएको छ । सरकारले अस्पतालबाट ९८ प्रकारका औषधि निःशुल्क वितरण गर्ने नीति लिए पनि प्रादेशिक अस्पताल जलेश्वरको निःशुल्क औषधि वितरण कक्षमा १५ देखि २० प्रकारका औषधि मात्र उपलब्ध छन्।
औषधि अभाव हुँदा उपचारमा समस्या भएको अस्पताल प्रमुख डा. विकास साहले बताउनुभयो । निःशुल्क वितरण गर्ने औषधि बिमा सेवाबाट पनि नपाउने, अस्पतालको औषधि वितरण कक्षमा पनि नहुनाले समस्या भएको जलेश्वर एक सामाजिक अभियन्ता जितेन्द्र पासवाले गुनासो गर्नुभयो। बिमाबाट पाइने केही औषधि भदौ १ देखि सरकारले निःशुल्क वितरण गर्ने भने पनि अस्पतालमा नपठाएकाले दीर्घरोगका बिरामी धेरै प्रभावित भएका पासवानको भनाइ छ ।
अस्पताल प्रमुख साहले मधेस प्रदेश सरकारको स्वास्थ्य आपूर्ति व्यवस्थापन केन्द्रले समयमा औषधि नपठाएकाले अभाव भएको बताउनुभयो। “सरकारले निःशुल्क वितरण गर्ने भनेका औषधि हामीले टेन्डर गरेर खरिद गर्न पाइँदैन । प्रदेश सरकारले समयमै औषधि नपठाउँदा समस्या भएको हो”, उहाँले भन्नुभयो।
दश नगरपालिका र पाँच गाउँपालिका भएको यस अस्पतालमा दैनिक ३०० जना बिरामी आउने गरेको बताउँदै अस्पताल प्रमुख डा. साहले दुई महिनादेखि औषधि चरम अभाव भएको गुनासो गर्दै समस्या समाधानका निम्ति सम्बन्धित निकायको ध्यानाकर्षण गराउँदै आएको बताउनुभयो ।
अस्पतालका प्रमुख डा साहले भन्नुभयो, “प्रदेश सरकारसँग औषधि पठाउन माग गरे पनि सुनुवाइ भएको छैन । प्रदेश सरकारसँग चालु आर्थिक वर्षको सुरुआतमै औषधि माग गरिए पनि हालसम्म प्राप्त हुन सकेको छैन।”
उहाँले आकस्मिक कक्षका लागि आवश्यक पर्ने औषधि अस्पतालले आफ्नै स्रोतबाट जेनतेन व्यवस्थापन गरिरहेको जानकारी दिँदै डा. साहले इमर्जेन्सी सेवा पनि प्रभावित बन्ने परिस्थिति उत्पन्न भएको दुःखेसो गर्नुभयो ।
तर निःशुल्क उपलब्ध नहुँदा नियमित औषधि सेवन गर्नुपर्ने मानसिक, मधुमेह, उच्च रक्तचाप, मुटुसम्बन्धी रोगलगायत नसर्ने रोगका बिरामी बढी प्रभावित भएका डा. साहले जानकारी दिनुभयो ।
सिटामोल, जीवनजल लगायत पाँच दश वटा आधारभूत औषधिबाहेक अन्य औषधि सधैँ मौज्दात नहुने, उच्च रक्तचाप र कोलेस्ट्रोलका बिरामीले नियमित खाने औषधि दुई महिनायता अस्पतालमा नआएको जनाइएको छ ।
डा. साहले मधुमेहका बिरामीलाई दिइने विभिन्न औषधिमध्ये पाँच सय एमजीको मेटफरमिन बाहेक अर्को कुनै औषधि उपलब्ध नभएको बताउनुभयो। “मेटफरमिन पनि ६ महिनाको अन्तरमा आउँछ । त्यस्तै उच्च रक्तचाप र कोलेस्ट्रोलका बिरामीले नियमित खानुपर्ने एट्रोभास्टिनको सबै मात्रा पछिल्लो नौ महिनादेखि अस्पतालमा उपलब्ध हुन सकेको छैन”, उहाँले भन्नुभयो ।
मधेस प्रदेश सरकारको स्वास्थ्य निर्देशनालय, विभाग र केन्द्र सरकारसँग पनि औषधिको लागि निरन्तर अनुरोध भएको प्रमुख साहले बताउनुभयो ।
