किएभ, चैत २४ गते । युक्रेनका राष्ट्रपति भोलोदिमिर जेलेन्स्कीले आफ्नो गृहनगरमा भएको क्षेप्यास्त्र आक्रमणमा नौ बालबालिकासहित १८ जनाको मृत्यु हुनुमा रुसको आलोचना गर्न कञ्जुसाईँ गरेको भन्दै अमेरिकी दूतावासको आलोचना गर्नुभएको छ ।
युक्रेनको मध्य भागमा रहेको क्राइभी रिग शहरमा रहेको बालबालिकाको खेलमैदान नजिकै रहेको एक आवासीय क्षेत्रमा शुक्रबार साँझ रुसी क्षेप्यास्त्र प्रहार भएको थियो ।
“आक्रमणमा ७२ जना घाइते भएका थिए भने उनीहरूमध्ये १२ जना बालबालिका रहेका छन्,” निप्रोपेट्रोभ्स्कका गभर्नर सर्गी लिसाकले आपतकालीन अभियानको अन्त्य पछि भन्नुभयो । आक्रमणपछि शहरका अधिकारीहरूले उक्त क्षेत्रमा तीन दिनको शोक घोषणा गरेका छन् ।
जेलेन्स्कीले सामाजिक सञ्जालमा एक भावनात्मक वक्तव्य जारी गर्दै आक्रमणमा मारिएका प्रत्येक बालबालिकाको नाम लिनुभएको छ भने अमेरिकी दूतावासले रुसलाई आक्रमणकारीको रूपमा उल्लेख नगरेकोमा आश्चर्य व्यक्त गर्नुभएको छ ।
जेलेन्स्कीले लेख्नुभएको छ, “दुर्भाग्यवश, यस्तो बलियो देश, यति बलियो जनता र यस्तो कमजोर प्रतिक्रिया अमेरिकी दूतावासको प्रतिक्रिया अप्रिय आश्चर्यजनक छ ।”
उहाँले भन्नुभएको छ, “बालबालिकालाई मार्ने क्षेप्यास्त्रको बारेमा कुरा गर्दा उनीहरू ’रुसी’ शब्द भन्न समेत डराउँछन् ।”
अमेरिकी राष्ट्रपति डोनाल्ड ट्रम्पले रुस र युक्रेनबीच आंशिक युद्धविरामका लागि दबाब दिइरहेका बेला मस्कोसँगको सम्बन्धमा सुधार ल्याउन अमेरिकाको आलोचना नगरेको जेलेन्स्कीले बताउनुभएको छ । रासस/एएफपी
