चैते धान प्रवर्धन गर्न किसानलाई प्रोत्साहन

अमरराज नहर्की
तनहुँ, चैत २३ गते । कृषि ज्ञान केन्द्र तनहुँले चैते धानखेती प्रवर्धन गर्न किसानलाई प्रोत्साहन गरेको छ । भारताबाट चामल र चिउराको आयातलाई घटाउन यहाँका किसान अनुदान दिएरलाई प्रोत्साहन गर्न थालिएको हो ।

चैते धान प्रवर्धन कार्यक्रममार्फत कृषकलाई ७५ देखि ८५ प्रतिशतसम्म अनुदानको व्यवस्था गरिएको केन्द्रले जनाएको छ । युवाहरूको वैदेशिक रोजगारीको आकर्षणले गर्दा जमिन बाँझो राख्नेक्रम बढेपछि ठुलो परिमाणमा भारतबाट चिउरा र चामल आयात गर्नुपर्ने बाध्यता भएकाले त्यसलाई घटाउन कार्यक्रम सञ्चालन गरिएको केन्द्रका सूचना अधिकारी किरण परियारले जानकारी दिनुभयो । 

परियारको अनुसार ढुवानी, बिउ, सिँचाइ, उपकरण खरिदमा अनुदानको व्यवस्था गरिएको छ । धानको बिउमा ७५ प्रतिशत र सिँचाइअन्तर्गत कुलो निर्माण र मर्मतमा ८५ प्रतिशत अनुदानको व्यवस्था छ । दुई हजार नौ ४० रोपनी खेतमा चैते धानखेती गर्न १३ वटा कृषक समूह तथा सहकारी समावेश गरिएको छ । 

कार्यक्रमका लागि ५० लाख बजेट विनियोजन भई कृषक समूह तथा सहकारीसँग सम्झौता गरिएको छ । कार्यक्रमअन्तर्गत धान चुट्ने थ्रेसर, खेत जोत्ने मिनिटिलर तथा ट्याक्टरमा अनुदानको व्यवस्था गरिएको छ । सबैभन्दा धेरै बजेट २० लाख सिँचाइ(कुलो) का लागि विनियोजन गरिएको छ ।

चैते धान विशेष गरी चिउराका लागि प्रयोग गरिने तर खेत बाँझो हुँदा भारतबाट आयात हुने गरेको परियार बताउनुहुन्छ । किसानबाट माग धेरै आएपनि बजेट थोरै भएकोले सबैलाई समेट्न कठिन भएको परियारले जानकारी दिनुभयो ।