खेलका माध्यमबाट पर्यटन प्रवर्धनमा टेवा पुग्छ : सञ्चारमन्त्री गुरुङ

माधवप्रसाद बराल
माछापुच्छ्रे (कास्की, चैत २३ ग्ते । सञ्चार तथा सूचना प्रविधिमन्त्री पृथ्वीसुब्बा गुरुङले खेलकुदको माध्यमबाट पोखरा र गण्डकी प्रदेशकै पर्यटनको प्रवर्धन गर्न सकिने बताउनुभएको छ । पोखरा रङ्गशालामा शनिबारदेखि सुरु भएको दोस्रो संस्करणको केपी ओली कप टी ट्वान्टी राष्ट्रिय खुल्ला पुरुष क्रिकेटको शुभारम्भ गर्नुहुँदै उहाँले पर्यटकीय राजधानी पोखरालाई खेलकुदको पनि हब बनाउनुपर्ने बताउनुभयो ।

“पोखराको क्रिकेट खेल मैदानलाई अन्तर्राष्ट्रिय स्तरको बनाउन आवश्यक छ,” उहाँले भन्नुभयो, “क्रिकेट खेलबाट पनि पर्यटन प्रवर्धनमा टेवा पुग्दछ ।” सरकारले पोखरा क्रिकेट खेल मैदानलाई स्तरवृद्धिको साथै पूर्वाधार निर्माणलाई प्राथमकितामा राखेको उहाँको भनाइ छ । सरकारका प्रवक्तासमेत रहेका गुरुङले अन्तर्राष्ट्रिय स्तरको क्रिकेट खेल पोखरामा आयाजना गर्न सक्ने गरी पूर्वाधार निर्माण गर्न सरकारले बजेट विनियोजन गर्ने बताउनुभयो ।

मदन भण्डारी स्पोर्टस् एकेडेमीको आयोजनमा सुरु भएको क्रिकेटमा १६ टिमको सहभागिता रहेको छ । ३० गतेसम्म सञ्चालन हुने प्रतियोगिताको विजेता टिमले नगद १० लाख र उपविजेताले नगद पाँच लाखका साथमा ट्रफी, मेडल तथा प्रमाणपत्र प्राप्त गर्नेछन् ।

म्यान अफ दी सिरिजले नगद ३० हजार, बेस्ट बलर, बेस्ट ब्याटरले जनही नगद १० हजार र म्यान अफ दी म्याचले नगद पाँच हजारका साथमा ट्रफी प्राप्त गर्नेछन् । प्रतियोगिता लिग कम नकाउटका आधारमा खेलाइने छ । पोखरामै भएको पहिलो संस्करणको उपाधि मधेश प्रदेशले जितेको थियो ।