गुल्मी उद्योग वाणिज्य सङ्घको अध्यक्षमा श्रेष्ठ

रमेश विश्कर्मा
गुल्मी, चैत २३ गते । गुल्मी उद्योग वाणिज्य सङ्घको नयाँ नेतृत्व चयन भएको छ । नयाँ नेतृत्व चयनका लागि अध्यक्ष पदमा सहमति नजुटेपछि शुक्रबार जिल्लाको सदरमुकाम तम्घासमा भएको मतदानबाट अध्यक्षमा मृगेन्द्रप्रसाद श्रेष्ठ निर्वाचित हुनुभएको निर्वाचन अधिकृत विष्णुप्रसाद बलालले जानकारी दिनुभयो ।

निर्वाचन अधिकृत बलालका अनुसार अध्यक्ष पदमा निर्वाचित हुनुभएका श्रेष्ठले ३२१ मत प्राप्त गर्नुभयो । उहाँका निकटतम प्रतिस्पर्धी रामप्रसाद पन्थीले २०१ मत प्राप्त गर्नुभयो। श्रेष्ठ निवर्तमान समितिका उपाध्यक्ष र पन्थी वरिष्ठ उपाध्यक्ष हुनुहुन्थ्यो । दुवै जना नेपाली कांग्रेस निकट व्यवसायी हुनुहुन्छ । कुल ५८५ मतदातामध्ये ४३२ पुरुष र १०३ महिलाले मतदान गर्नुभयो ।

अन्य पदहरूमा सहमतिसँगै आवश्यक पद अनुसार उम्मेदवारी परेको थियो । सङ्घको अधिवेशनबाट उपाध्यक्षमा ईश्वरीप्रसाद बेल्बासे, गोपालप्रसाद भुसाल, ताराप्रसाद भुसाल, महासचिवमा चेतनारायण पाण्डे, सचिवमा विष्णुप्रसाद अधिकारी, कोषाध्यक्षमा ईश्वरीप्रसाद कंडेल र सह–कोषाध्यक्षमा कृष्ण खनाल सर्वसम्मत निर्वाचित हुनुभएको उहाँले बताउनुभयो ।

त्यसैगरी खुला सदस्यमा महेशकुमार राजभण्डारी, बादल श्रेष्ठ, तोमलाल पन्थी, ज्ञान बहादुर भलामी, किशोरप्रसाद मरासिनी, रामु सुनार, चन्द्रमणि भण्डारी, चन्द्रमणी पाण्डे, महिला सदस्यमा कमला श्रेष्ठ (बजिमय) र शशी केसी सर्वसम्मत निर्वाचित हुनुभएको छ । गत चैत ८ गते गुल्मी उद्योग वाणिज्य सङ्घको ३३ औं साधारणसभा तथा अधिवेशनको उद्घाटन नेपाल उद्योग वाणिज्य महासङ्घका वरिष्ठ उपाध्यक्ष अन्जनकुमार श्रेष्ठले उद्घाटन गर्नुभएको थियो ।

यसअघि नन्दराम भुसाल, नरप्रसाद श्रेष्ठ, त्रैलोक्य प्रताप सेन, डिल्लीराज भुसाल, राजेन्द्रप्रसाद श्रेष्ठ, कृष्णप्रसाद भण्डारी, अखिलेश्वरप्रसाद पाण्डेय, दुर्गाप्रसाद पाण्डेय, श्रीप्रसाद भलामी, इश्वरीप्रसाद पौडेलले गुल्मी उद्योग वाणिज्य सङ्घको अध्यक्षको जिम्मेवारी सम्हाली सक्नुभएको छ ।