चाँदनी आचार्य
घोडाघोडी(कैलाली), चैत २३ गते । कैलालीको घोडाघोडी बहुमुखी क्याम्पसमा शनिबार बिहानदेखि स्वतन्त्र विद्यार्थी युनियनको मतदान जारी रहेको छ । शनिबार बिहान ८ देखि अपराह्न ४ बजेसम्म मतदानको समय तोकिए पनि बिहान ८ः२० बाट मतदान कार्य सुरु भएको निर्वाचन समितिले जनाएको छ ।
एक हजार ६९१ जना मतदाता नामावलीमा नाम भएका विद्यार्थीले स्ववियु पदाधिकारी चयनका लागि बिहानदेखि लामबद्ध भएर मतदान प्रक्रियामा भाग लिएका छन् ।
मतदान कार्यलाई शान्त र निष्पक्षरूपमा सम्पन्न गर्नका लागि मतदान क्षेत्रमा जनपद र सशस्त्र प्रहरीबलका सुरक्षाकर्मीहरू परिचालित गरिएको छ । चारवटा बुथबाट विद्यार्थीले मतदान गरिरहेको निर्वाचन समितिका संयोजक विनोदकुमार खड्काले जानकारी दिनुभयो ।
विद्यार्थीले आफ्नो परिचयपत्र देखाएर मतदान गर्न पाउने व्यवस्था गरिएको छ । सुदूरपश्चिम प्रदेशको त्रिभुवन विश्वविद्यालयबाट सम्बन्धन प्राप्त धेरै विद्यार्थी सङ्ख्या भएको उक्त क्याम्पसको स्ववियु निर्वाचनलाई विशेष रूपमा हेरिएको छ ।
विगतमा अखिल क्रान्तिकारीबाट स्ववियुमा बहुमत बनाउँदै आएको उक्त क्याम्पसमा यसपटक संयुक्त प्यानल बिच कडा प्रतिस्पर्धा देखिएको छ । उक्त निर्वाचन आफ्नो पक्षमा सफल बनाउन विभिन्न विद्यार्थी सङ्गठन आबद्ध राजनीतिक दलका केन्द्र, प्रदेशदेखि जिल्लातहका नेताहरूको बिहानैदेखि निर्वाचन स्थल वरपर भिडभाड लागेको छ ।
निर्वाचन प्रक्रियामा भाग लिन यसअघि छ वटा सङ्गठन दर्ता भए पनि तीनवटा प्यानल बिच प्रतिस्पर्धा हुने भएको छ । अखिल क्रान्तिकारीका गणेश भण्डारी अध्यक्ष रहेको प्यानलले अन्य तीन सङ्गठनलाई समेटेर संयुक्त प्यानल बनाएको छ भने नेपाल विद्यार्थी सङ्घसहितको संयुक्त प्यानल रहेको अनेरास्ववियुका अशोक गौतम अध्यक्ष रहेको अर्को प्यानल रहेको छ । त्यसैगरी, अखिल (समाजवादी)का यामबहादुर खत्रीको छुट्टै प्यानल रहेको छ ।
स्वतन्त्र विद्यार्थी युनियन निर्वाचन तालिका अनुसार चैत्र ५ गते सबै क्याम्पसमा निर्वाचनको मिति तोकिएको थियो, तर उक्त क्याम्पसमा विद्यार्थी नामावलीको विषयमा सहमति नजुटेपछि फागुन २६ गते नेपाल विद्यार्थीसङ्घले निर्वाचन कार्यालयमा तालाबन्दी गरेपछि निर्वाचन प्रक्रिया स्थगित भएको थियो ।
समस्या समाधानका लागि विद्यार्थी सङ्गठनहरू बिचको छलफलपछि चैत्र २३ गतेलाई निर्वाचन तोकी नयाँ प्रक्रियाबाट निर्वाचन अगाडि बढेको निर्वाचन समितिले जनाएको छ ।
-square-thumb.jpg)
-original-thumb.jpg)
