रेखीराम राना
तानसेन, चैत २२ गते । वनमा लागेको डढेलो आगो निभाउने क्रममा एक जना पुरुषको मृत्यु भएको छ । मृत्यु हुनेमा रिव्दीकोट गाउँपालिका–७, पालुङ्मैनादीका ६१ वर्षीय टेकबहादुर सर्तुङ्गीमगर रहनुभएको छ ।
बिहीबार बेलुकी ५ बजेतिर घर नजिकैको पालुङ् सामुदायिक वनमा लागेको डढेलो निभाउने क्रममा भिरबाट लडेर आगोमा जली उहाँको मृत्यु भएको प्रहरीले जनाएको छ ।
वनमा लागेको डढेलो निभाउने क्रममा उहाँ सर्तुङ्गीमगर भिरबाट २० मिटर तल आगोमा खसेको जिल्ला प्रहरी कार्यालय पाल्पाका प्रहरी निरीक्षक सन्दीप बेल्बासेले जानकारी दिनुभयो । घटनाबारे थप अनुसन्धान भइरहेको उहाँले बताउनुभयो ।
पछिल्लो केही दिनयता पाल्पाका विभिन्न स्थानमा डढेलो लागेको छ । डढेलोका कारण स्थानीय बासिन्दा त्रसित छन् । बस्तीलाई जोगाउन रातभर जाग्राम बस्ने गरेका छन् ।
