विजयकुमार साह
ढल्केबर, चैत २१ गते । धनुषाको ढल्केबरस्थित देशकै सबैभन्दा ठुलो विद्युत् सब स्टेसनमा लागेको आगलागी नियन्त्रणमा आएको छ । नजिकै रहेको बसही खोलामा फालिएको फोहरबाट सुरु भएको आगो फैलिँदै गएपछि सब स्टेसनको पश्चिमी भागमा आगलागी भएको थियो ।
नेपाल विद्युत प्राधिकरणका महाशाखा प्रमुख विनोद लोहनीले सब स्टेसनको पश्चिमी भागमा लागेको आगो कर्मचारी र सुरक्षाकर्मीले वारुण यन्त्रको सहयोगमा नियन्त्रणमा लिएको बताउनुभयो । उहाँले बुधबार करिब १२ बजे आगलागी भएको जानकारी दिनुभयो ।
उहाँका अनुसार आगलागीबाट सब स्टेसनको पश्चिम भागमा सामान्य क्षति पुगेको छ । आगलागीबाट ग्रिड पावर ट्रान्सफर्मरसँग जडान गरिएको तारमा क्षति पुगेको छ ।
आगलागीबाट थप क्षति हुन नदिन धनुषा, सिराहा र मलङ्गवा क्षेत्रमा विद्युत् आपूर्ति बन्द गरिएको थियो । आगलागी नियन्त्रणपछि जनकपुर क्षेत्रको विद्युत् सेवा पुनः सुचारु गरिएको छ भने जाँच तथा मर्मतपछि सिराहा र मलङ्गवा फिडरमा पनि विद्युत् प्रवाह गर्ने तयारी भइरहेको महाशाखा प्रमुख लोहनीले बताउनुभयो ।
