किरण श्रेष्ठ
दमौली (तनहुँ), चैत २१ गते । जाडो महिना सकिएर गर्मी लाग्दै गर्दा मौसम परिवर्तनले निम्त्याउने विभिन्न स्वास्थ्य समस्या लिएर तनहुँका अस्पतालमा उपचारका लागि आउने बिरामीको सङ्ख्या बढ्दै गएको छ । सबैभन्दा बढी मौसमजन्य रोग भाइरल ज्वरो, रुघाखोकी, घाँटी दुख्ने जस्ता समस्या लिएर तनहुँका सरकारी तथा निजी अस्पतालमा उपचारका लागि बिरामीको सङ्ख्यामा वृद्धि भएको हो ।
प्रदेश अस्पताल दमौलीका अनुसार फागुनदेखि नै मौसमजन्य रुघाखोकी, भाइरल ज्वरो र घाँटी दुख्नेलगायतका समस्या लिएर बिरामी उपचारका लागि आउने गरेका छन् । अस्पतालका मेडिकल सुपरिन्टेन्डेन्ट परिवर्तन बरालका अनुसार अस्पतालमा अहिले दैनिक चार सय ५० भन्दा बढी बिरामी उपचारका लागि आउने गरेका छन् । त्यसमध्ये दैनिक एक सय ५० भन्दा बढी भाइरल रोगजन्य बिरामी रहेको डा.बरालले बताउनुभयो ।
‘‘मौसम परिवर्तन हुने बेलामा मौसमजन्य बिरामीको सङ्ख्या बढ्छ ।’’ उहाँले भन्नुभयो ‘‘यो क्रम अझै केही समयमा बढ्छ ।’’ बेलैमा सजगता नअपनाउने हो भने मौसमजन्य प्रकोपले ज्यानै जान सक्ने उहाँले बताउनुभयो ।
यसैगरी तनहुँकै जिपी कोइराला राष्ट्रिय श्वासप्रश्वास उपचार केन्द्रमा पनि रुघाखोकी, भाइरल ज्वरो तथा टाउको दुख्ने जस्ता सङ्क्रमणजन्य बिरामी बढेका छन् । अस्पतालका कार्यकारी निर्देशक डा. रामकुमार श्रेष्ठले महिला तथा बालबालिकामा अहिले रुघाखोकी र ज्वरो आउने समस्या देखिएको बताउनुभयो ।
उहाँले मौसममा आउने परिवर्तनका कारण केही समय यस्ता बिरामीको सङ्ख्या बढ्ने उल्लेख गर्नुभयो । उहाँका अनुसार जाडो सकिएर गर्मी लाग्दै गएकाले भाइरल ज्वरो, रुघाखोकीलगायतका बिरामीको सङ्ख्यामा वृद्धि भएको हो । ‘‘अहिले अस्पतालमा दुई सय ५० भन्दाबढी दैनिक ओपिडीका बिरामी पुगेको छ ।’’ डा. श्रेष्ठले भन्नुभयो, ‘‘जसमा ज्वरो र रुघाखोकीका डेढ सय जति दैनिक हुन्छन ।’’
यस्तै दमौलीकै निजि समाधान अस्पतालमा पनि बिरामीको सङ्ख्या दैनिक बढ्दै गएको अस्पतालका डा.श्रीराम चन्द ठकुरीले जानकारी दिनुभयो । अस्पतालमा आउने यस्ता बिरामीलाई चिकित्सकले पानी उमालेर खाने, साबुन पानीले राम्ररी हात धुने, बासी सडेगलेको खानेकुरा नखाने, धुलोधुँवाबाट बच्ने, मास्क लगाएर मात्रै हिँड्डुल गर्ने र आराम गर्नेलगायतका सुझाव–सल्लाह दिने गरेको डा.ठकुरीले बताउनुभयो ।
