प्रदेश अस्पताल बेनीको भवन निर्माण अन्तिम चरणमा

ठाकुरप्रसाद आचार्य
म्याग्दी, चैत २१ गते । म्याग्दीको बेनीमा निर्माणधिन ५० शय्या क्षमताको प्रदेश अस्पताल बेनीको भवन निर्माण अन्तिमचरणमा पुगेको छ । ठेक्का सम्झौता मितिभन्दा साढे पाँच वर्ष ढिला गरी भवन निर्माण सम्पन्न हुन लागेको हो । ठेकेदारको ढिलासुस्ती र लापरबाहीका कारण अस्पताल भवन लामो समय सम्म अलपत्र पर्दै आएको थियो ।

पछिल्लो समय म्याग्दीका राजनीतिक दल, जनप्रतिनिधि र सरोकारवालाहरुको दबाबका कारण निर्माण व्यवसायी काममा फर्किएर भवन निर्माण पुनः सुरुवात गरेको थियो ।

अन्तिम पाँचौं पटक थपिएको म्याद यही चैत मसान्तमा सकिँदै छ । सघन सहरी तथा भवन निर्माण आयोजना कार्यालय बागलुङले २०७३ मङ्सिर २१ गते अस्पताल भवन निर्माणका लागि महादेव खिम्ती–गल्वा–रफिना जेभीसँग २०७६ मङ्सिर २० गते भित्र निर्माण सम्पन्न गर्ने गरी  १८ करोड ८४ लाख आठ हजार ८९ रुपियाँमा ठेक्का सम्झौता गरेको थियो ।

भवन निर्माण अन्तिम चरणमा पुगेको छ आयोजना कार्यालय बागलुङका इन्जिनियर विरबल सुनारले भन्नुभयो, ‘‘भवन निर्माणको ९५ प्रतिशत काम सम्पन्न भएको छ । भवनको संरचना निर्माणको काम सकिएको छ । भवनको रङरोगनको काम पनि अन्तिमचरमा पुगेको छ । भवन देखि वाहिर पाँचसय मिटर रिङरोड कालोपत्रे काम मात्र बाँकी छ । अन्तिम पाँचौ पटक थपिएको ठेक्काको म्याद यही चैत मसान्तभित्र सकिँदै छ । मसान्त भित्र निर्माण सम्पन्न गर्न निर्माण व्यवसायीलाई ताकेता गरेका छौं । केही कामहरु बाँकी रहे वैशाख १५ भित्र जसरी पनि निर्माण गर्ने लक्ष्य छ ।’’

उहाँका अनुसार चार हजार ९६३ वर्गमिटर क्षेत्रफलमा निर्माण गरिएको चार तले तीन वटा भवनको भित्री भाग पलास्टर र रङरोगन गर्न, विद्युत, पानी जडान गर्न, झ्यालढोका र टायल राख्ने काम अन्तिम चरणमा पुगेको छ ।  

जिल्लाका राजनीतिक दल, जनप्रतिनिधि र अन्य सरोकारवालाहरुको दबाबपछि भवन निर्माणले गति लिएको र अहिले अन्तिम चरणमा आइपुगेको प्रदेश अस्पताल व्यवस्थापन समितिका अध्यक्ष समेत रहनुभएका जिल्ला समन्वय समितिका उपप्रमुख डिलकुमारी खत्रीले बताउनुभयो । सुविधा सम्पन्न भवन निर्माण सम्पन्न भएपछि बिरामीको उपचारमा धेरै सहज हुने उहाँको विश्वास छ ।

अहिले पचास शय्या क्षमता भए पनि १५ शय्याको संरचना र पूर्वाधारबाट सेवा दिनुपर्ने बाध्यता रहेको उहाँले बताउनुभयो । भवन निर्माण सम्पन्न भएर पूर्णरुपमा अस्पताल सञ्चालनमा आएपछि म्याग्दीका साथै पर्वत, बागलुङ र मुस्ताङका सर्वसाधारणले समेत स्वास्थ्य सेवा लिन सहज हुने व्यवस्थापन समिति अध्यक्ष खत्रीले बताउनुभयो । भूकम्प प्रतिरोधी क्षमताको भवन अपाङमैत्री छ । 

निर्माण भएको भवनको भुइँतलामा लोन्डरी, मोर्टुअरी, किचन, पहिलो तलामा इमरजेन्सी, ल्याब, रेडियोलोजी, पहिलो तलामा अपरेसन थियटर, बहिरङ्ग सेवा र अन्तिम तलामा प्रशासन रहने जनाइएको छ ।