कपिलवस्तु समाचारदाता
कपिलवस्तु, चैत २१ गते । कपिलवस्तुको शिवराज नगरपालिका–१, उमरीमा थारू सङ्ग्रहालय निर्माण भएपछि स्थानीय पर्यटकको चहलपहल बढेको छ । थारू सभ्यता, रहनसहनको संरक्षण हुने गरी सङ्ग्रहालय निर्माण भएपछि अवलोकनकर्ता यसतर्फ आकर्षित बनेका छन् ।
नगरपालिका र सङ्घीय सरकारको दुई करोड ५० लाख रुपियाँ लागतमा सङ्ग्रहालय निर्माण भएको नगर उपप्रमुख शिवकुमारी थारूले बताउनुभयो । थारू सभ्यता जोगाउन पुख्र्यौली सामग्री सङ्कलन र थारू पहिचानसहितको प्रतिमा निर्माण भएको छ ।
सङ्ग्रहालयमा माछा मार्दै गरेकी महिला, थारू पहिरनमा सजिएका महिला तथा पुरुषका प्रतिमा निर्माण हुने उहाँले जानकारी दिनुभयो । थारू समुदायले परम्परागत रूपमा प्रयोग गर्दै आएका सामग्री डोकवा, झउवा, खटिया, मचिया, चकिया, ढेकी, माटाका गाग्री, चुल्हा, लेहङ्गा, करवा, डरुवा, डोली, परगेहनी, मङ्गिया, कारा, बिँडियालगायतका पहिचान झल्किने सामग्री स्थानीयबाट सङ्कलन गरिएको सङ्ग्रहालय संरक्षण समितिका अध्यक्ष प्रकाश थारूले बताउनुभयो ।
सङ्ग्रहालय निर्माणपछि स्थानीयमा रौनकता छाएको थारू समुदायका अगुवा हिरालाल थारू बताउनुहुन्छ । सङ्ग्रहालयले पर्यटनको विस्तार भई स्थानीयलाई व्यावसायिक रूपमा फाइदा पुग्नुका साथै रोजगारीसमेत सिर्जना भएको छ । हाल उक्त स्थलमा पिकनिक जाने, थारू खानाका परिकार खाने र थारू पोसाक लगाएर तस्बिर खिच्नेको घुइँचो लाग्ने गरेको छ ।
