• २१ चैत २०८१, बिहिबार

बढ्दो क्षयरोगको सामना गर्न नयाँ कार्ययोजना तयार पार्दै बेलायत

blog

लन्डन, चैत २० गते । बेलायतले बुधबार स्वास्थ्य विशेषज्ञ र क्षयरोग (टिबी) बाट पीडित व्यक्तिहरूलाई यस रोगको रेकर्ड वृद्धिको सामना गर्दै नयाँ पञ्चवर्षीय कार्ययोजना तयार गर्न सहयोग गर्न आग्रह गरेको छ । सन् २००० मा बढ्दो निगरानी सुरु भएदेखि सन् २०२३ मा इङ्गल्यान्डले क्षयरोगका मामिलाहरूमा सबैभन्दा ठूलो वार्षिक वृद्धि (११ प्रतिशत) रेकर्ड गरेको थियो ।

सन् २०२४ का लागि अनुमानित आँकडाले यस्तै विश्वव्यापी प्रवृत्तिलाई प्रतिबिम्बित गर्दै थप १३ प्रतिशत वार्षिक वृद्धि भई पाँच हजार चार सय ८० मामिला भएको सङ्केत गर्दछ । बेलायतमा क्षयरोगको रोकथाम, पहिचान र नियन्त्रणमा सुधार गर्ने उद्देश्यले सरकार आफ्नो नयाँ राष्ट्रिय कार्ययोजना (२०२६/२०३१) तयार गर्ने प्रारम्भिक चरणमा छ ।

यसले शैक्षिक, स्वास्थ्य र सामाजिक हेरचाह व्यवसायीहरू, जनस्वास्थ्य विज्ञहरू, डाटा वैज्ञानिकहरू र क्षयरोगको जीवित अनुभव भएका व्यक्तिहरूलाई उनीहरूको अन्तरदृष्टि साझा गर्न आह्वान गरेको छ । “क्षयरोग निको र रोकथाम योग्य छ, तर इङ्गल्यान्डमा यो रोग गम्भीर जनस्वास्थ्यको समस्या बनेको छ”, स्वास्थ्य सुरक्षा एजेन्सी (युकेएचएसए) का क्षयरोग एकाइ प्रमुख एस्थर रोबिन्सनले भन्नुभयो, “इङ्गल्यान्डलाई अझै पनि क्षयरोगका लागि कम–घटना देश मानिए पनि, हालका वर्षहरूमा मामिलामा भएको वृद्धिले ‘हामी अहिले’ विश्व स्वास्थ्य सङ्गठनले परिभाषित गरेको कम-घटना सीमा प्रति एक लाख जनसङ्ख्यामा १० मामिलाभन्दा केही कम मात्र छौँ ।”

बेलायतमा यस रोगको सबैभन्दा बढी घटना ८१ दशमलव पाँच प्रतिशत मुलुकबाहिर जन्मेका मानिसहरूमा रहेको सरकारले बताएको छ । बेलायतमा गरिएको अनुसन्धानले क्षयरोग र गरिबीबीच स्पष्ट सम्बन्ध देखाएको छ । यसमा घरबारविहीनहरू, लागूऔषध र रक्सीको लतमा परेका व्यक्तिहरू र आपराधिक न्याय प्रणालीसँग सम्पर्क गरेका व्यक्तिहरू समावेश छन् । “प्रमाणका लागि यो आह्वानले हामीलाई एउटा कार्ययोजना विकास गर्न मद्दत गर्नेछ जसले विशेष गरी सबैभन्दा बढी प्रभावितहरूको आवश्यकतामा ध्यान केन्द्रित गर्दै यस प्रवृत्तिलाई उल्ट्याउन सबैभन्दा प्रभावकारी हस्तक्षेपहरूलाई प्राथमिकता दिन्छ”, रोबिन्सनले भन्नुभयो । रासस/एएफपी