सञ्जयकुमार मिश्र
गौर, चैत २० गते । श्रद्धा, भक्ति एवं धार्मिक सहिष्णुताको रूपमा रहेको चैती छठ पर्व रौतहट जिल्लामा अत्यन्त उत्साह र महत्त्वका साथ मनाउन लागिएको छ । विगत भन्दा अहिले चैती छठ पर्व गर्ने ब्रतालुको सङ्ख्या वृद्धिसँगै कात्तिक महिनामा मनाइने छठ पर्व जस्तै चैती छठ पनि अत्यन्त उत्साह र महत्त्वका साथ मनाउन लागिएको हो ।
शुद्धता र आपसी सदभावको रूपमा चैती छठ पर्व मनाउनका लागि ब्रतालु तैयारीमा जुटेका छन् । छठ पर्वका पहिलो दिन मङ्गलबार ब्रतालुहरू नुहाइधुवाइ चोखो खाना खाई आज दोस्राे दिन अर्थात् बुधबार बेलुका सख्खर हालेको खिर, पुरी, केरा लगायतका प्रसाद चढाएर पूजा गरी त्यही प्रसाद खाएर उपवास बस्ने र बिहीबार अस्ताउँदो सुर्यलाइ र शुक्रबार उदाउँदो सूर्यलाइ अर्घ दिएपछि चैती छठ पर्व सम्पन्न हुने ब्रतालु मिथलेश देवीले बताउनुभयो ।
छठ पर्वको प्रसादका रूपमा केरा, सुन्तला, नरिवल, अदुवा, गहुँको पिठोले बनाइएको ठेकुवा, उखु लगायतका प्रसाद बासले बनेको छिटा, दौरा, सुप तथा माटोले बनेको हात्ती, ढकना, दियो र कलस लगायत पूजा सामग्रीको प्रयोग गरिन्छ जसलाई शुद्धताको प्रतिकको रूपमा लिने गरिएको ब्रतालु मिथलेश देवीले बताउनुभयाे ।
छठ पर्व वर्षमा दुई पटक काति्तक र चैत महिनामा छठ पर्व मनाउँदै आइरहेकाे तथा छठ पर्व गर्नाले घरमा सुख शान्ति तथा चर्मरोग निको हुने धार्मिक विश्वास रहेको पण्डित जिवनेश्वर झाले बताउनुभयो ।
छठ पर्वमा सूर्यदेवको पूजा आराधना गर्नाले आपसी सद्भाव र प्रेमका रूपमा पनि लिने गरेको तथा पहिलेभन्दा अहिले चैती छठ पर्व गर्ने ब्रतालुको सङ्ख्यामा वृद्धि हुँदै गएको पण्डित झाले जानकारी दिनुभयो ।
