लोडसडिङ हटेकामा खुसी

गोरखापत्र समाचारदाता

काठमाडौँ, चैत २० गते । औद्योगिक क्षेत्रमा विद्युत् आपूर्ति नियमित भएको भन्दै फेडेरेसन अफ नेपाल एक्सपोर्ट एसोसिएसनले खुसी भएको जनाएको छ । फेडरेसनले एक विज्ञप्ति जारी गर्दै नेपाल विद्युत् प्राधिकरणले केही दिनदेखि औद्योगिक क्षेत्रमा नियमित विद्युत् आपूर्ति गरिरहेको जनाएको छ ।

भारतबाट आवश्यक मात्रामा विद्युत् आयातको पहल गरेर लोडसेडिङ घटाएको भन्दै प्राधिकरण, ऊर्जा मन्त्रालय र सरकारलाई एसोसिएसनले धन्यवादनसमेत दिएको छ ।

एसोसिएसनले विगतमा औद्योगिक क्षेत्रमा रहेको लोडसेडिङका कारण उत्पादनमूलक उद्योगमा प्रत्यक्ष असर परिरहेकोसमेत जनाएको छ । एसोसिएसनमा आबद्ध उद्योगले विगतमा क्षमता अनुसार निर्यातमुखी उत्पादन गर्न नपाएको, जसकारण उद्योगले आम्दानी तथा राज्यले राजस्व गुमाइरहेको र त्यसको असर समग्र अर्थतन्त्रमा परेको जनाएको छ ।

पछिल्लो केही दिनयता छिमेकी राष्ट्र भारतबाट थप बिजुली आयात गरी नेपाल विद्युत् प्राधिकरणले औद्योगिक क्षेत्रमा नियमित विद्युत् आपूर्ति गरिरहेको एसोसिएसनले जनाएको छ । यससँगै अब औद्योगिक क्षेत्रले निरन्तर चौबिसै घण्टा विद्युत् उपभोग गर्न पाउने सुनिश्चितको अपेक्षा गरिएको विज्ञप्तिमा उल्लेख छ ।