गोरखापत्र समाचारदाता
काठमाडौँ, चैत २० गते । उपप्रधानमन्त्री एवं अर्थमन्त्री विष्णुप्रसाद पौडेलले आगामी आर्थिक वर्ष २०८२/८३ को बजेटमा कार्यान्वयनयोग्य र यथार्थपरक कार्यक्रम तथा योजना ल्याउनुपर्ने बताउनुभएको छ । बजेट निर्माणबारे श्रम, रोजगार तथा सामाजिक सुरक्षा मन्त्रालयसँगको छलफलमा अर्थमन्त्री पौडेलले वितरणमुखी र लोकप्रिय हुनेभन्दा यथार्थपरक र कार्यान्वयनयोग्य कार्यक्रम तथा योजना आवश्यक भएको बताउनुभएको हो ।
उहाँले श्रम, सिप, रोजगारी र उत्पादनलाई प्राथमिकता दिनुपर्ने उल्लेख गर्दै वितरणले मात्र उचित प्रतिफल दिन नसक्ने स्पष्ट पार्नुभयो ।
अर्थमन्त्री पौडेलले सामाजिक सुरक्षासँग जोडिएका कार्यक्रमलाई गम्भीर रूपमा समीक्षा गर्न जरुरी रहेको औँल्याउनुभयो । विभिन्न मन्त्रालय र निकायसँग भएका कार्यक्रमलाई एकीकृत गर्नुपर्नेमा पनि उहाँले जोड दिनुभयो ।
छलफलमा श्रम, रोजगार तथा सामाजिक सुरक्षामन्त्री शरतसिंह भण्डारीले रेमिट्यान्सलाई अझ बढी व्यवस्थित गर्न जरुरी रहेको भन्दै वैदेशिक रोजगारबाट फर्किएकाको सिप सदुपयोग र आन्तरिक रोजगारीका लागि प्राथमिकता दिनुपर्ने बताउनुभयो ।
राष्ट्रिय योजना आयोगका सदस्य डा. प्रकाशकुमार श्रेष्ठले प्रधानमन्त्री रोजगार कार्यक्रमको समीक्षा गरी अघि बढ्न आवश्यक देखिएको बताउनुभयो । अर्थ सचिव घनश्याम उपाध्यायले सिप विकासलाई प्राथमिकता दिनुपर्नेमा जोड दिनुभयो ।
-original-thumb.jpg)