साधन घर्ती
म्याग्दी (दरबाङ), चैत ११ गते । म्याग्दीको रघुगङ्गा गाउँपालिका–२ र ३ का दुई हजार चार सयभन्दा बढी घरपरिवारमा खानेपानी सुविधा विस्तारका लागि प्रस्तावित बृहत पिप्ले–भगवति खानेपानी आयोजना वार्षिक कार्यक्रममा समावेश हुन थालेको नौ वर्षपछि कार्यान्वयनको चरणमा प्रवेश गरेको छ ।
आर्थिक वर्ष २०७३/२०७४ देखि सङ्घीय सरकारको वार्षिक कार्यक्रम (रातो किताब)मा समावेश हुन थालेको यस आयोजना बनाउन दश करोड रुपियाँको ठेक्का आह्वान भएसँगै निर्माण प्रक्रिया सुरु भएको हो ।
बृहत पिप्ले–भगवती खानेपानी आयोजना वार्षिक कार्यक्रममा समावेश भए पनि बजेट अभाव झल्दै आइरहेको अवस्थामा टेण्डर आह्वान भएसँगै भगवती र पिप्लेवासीको बषौंदेखिको माग पूरा हुने म्याग्दीबाट निर्वाचित प्रतिनिधिसभा सदस्य सांसद खमबहादुर गर्बुजा ‘खम्बिर’ले बताउनुभयो ।
उहाँले भन्नुभयो, ‘‘लामो समयको प्रयासपछि आयोजना कार्यान्वयमा गएको छ । अब हरेक वर्ष स्रोतको कुनै कमी हुँदैन, समयमै सम्पन्न गर्ने गरी अबका प्रक्रियामा पनि लाग्ने छु ।’’
बहुवर्षीय ठेक्का लगाउन अर्थमन्त्रालयले स्रोत सहमति दिएको थियो । १० करोडको टेण्डरमा कन्टिन्जेन्सी खर्च कटाएर सात करोड २६ लाख बराबरको काम चालु आव २०८१/८२ देखि नै कार्यान्वयन हुने सङ्घीय खानेपानी तथा ढल व्यवस्थापन आयोजनाका इन्जिनियर नवीन सुवेदीले बताउनुभयो । ३९ करोड ३३ लाख रुपियाँ लागत अनुमान गरिएको आयोजनाको विस्तृत परियोजना प्रतिवेदन (डिपिआर) स्वीकृत र बहुवर्षीय ठेक्का आह्वान गर्न अर्थ मन्त्रालयले स्रोत सहमति नदिँदा कार्यान्वयन हुन नसकेपछि निरन्तरको दबाबसँगै टेण्डर आह्वान भएको गाउँपालिका अध्यक्ष भवबहादुर भण्डारीले बताउनुभयो ।
चारवटा प्याकेजमा विभाजन गरेर पहिलो प्याकेजको काम सुरु गर्न ठेक्का आह्वान भएको सङ्घीय खानेपानी तथा ढल व्यवस्थापन आयोजनाले जनाएको छ । रघुगङ्गा गाउँपालिका–७, चिमखोला भएर बग्ने बगरखोलाको मुहान मानिने खालीखोलाबाट भगवती र पिप्लेको शिर रुइसेडाँडामा रहने मुख्य ट्याङकीसम्म पानी ल्याउन ३० किलोमिटर लामो मुख्य पाइप लाइन रहने छ । सङ्घीय सरकारको ८० र उपभोक्ताको २० प्रतिशत लागत साझेदारीमा आयोजना निर्माण हुन लागेको हो । रघुगङ्गाका सबैभन्दा बढी जनघनत्व रहेको क्षेत्र वडा नं २ र ३ मा पर्ने बस्तीहरू हुन् ।
