माओवादी बिना संविधान संशोधन असम्भव : महासचिव गुरुङ

गुणबहादुर रोका 

सुलीकोट, चैत १० गते । नेपाल कम्युनिष्ट पार्टी (माओवादी केन्द्र) का महासचिव देव गुरुङले माओवादी केन्द्र बिना संविधान संशोधन गर्ने कुरा असम्भव रहेको बताउनुभएको छ । तमु मुक्तिमोर्चा गोरखाको छैटाैं जिल्ला सम्मेलनलाई आइतबार गोरखामा सम्बोधन गर्नुहुँदै उहाँले काँग्रेस, एमाले र सत्तामा रहेका दलहरुबाट मात्र संविधान संशोधन हुन नसक्ने बताउनुभयो ।

"यो संविधान माओवादीसँग सम्झौता गरेर आएको संविधान हो, महासचिव गुरुङले भन्नुभयो, "संविधान संशोधन गर्नै पर्ने भयो भनेपनि अहिलेको संविधानको ‘स्टेक हेल्डर’ माओवादी पनि भएकाले माओवादीसँगको सहमति बिना त संशोधन हुन सक्दैन ।" उहाँले माओवादी विना नै संविधान संशोधन गर्ने काँग्रेस एमाले सहमतिले प्रतिगामी शक्तिहरु चलमलाउन थालेको दाबी गर्नुभयो । 

"अब देशमा राजतन्त्र असम्भव छ, प्रतिगामी शक्तिहरुले खाली उचाल्ने, पछार्ने र राष्ट्रिय राजनीतिमा अस्थिरता सृजना गर्ने काम मात्र भइरहेको छ", महासचिव गुरुङले भन्नुभयो, "यो अवस्थालाई ध्यानमा राखेर प्रतिगमनको विरोध र भण्डाफोर गर्नुपर्छ ।" सरकारको कमीकमजोरीलाई पनि सशक्त ढङ्गबाट उठाउनुपर्नेमा उहाँले जोड दिनुभयो । 

महासचिव गुरुङले अहिले काँग्रेस र एमाले असफल हुँदा त्यसको विकल्प माओवादी केन्द्र भएको भन्दै राजसंस्था विकल्प हुनै नसक्ने स्पस्ट पार्नुभयो । "दरबारको असफलताको विकल्प निश्चित रुपमा काँग्रेस, एमालेदेखि लिएर माओवादीसम्म नै हो", उहाँले भन्नुभयो, "तर अब काँग्रेस एमाले असफल हुँदा त्यसको विकल्प माओवादी हो, दरबारिया होइन र हुनै सक्दैन ।"

मुलुकको परिवर्तनका लागि माओवादीले सबैलाई गोलबन्द गरेर अगाडि बढ्नुपर्ने भन्दै महासचिव गुरुङले फेरि माओवादीले अभिभावकीय भूमिका लिनुपर्ने अवस्था आएको बताउनुभयो ।