किशाेरीलाई अपहरणपछि दुर्व्यवहार गरेकाे आरोपमा ६ जना पक्राउ

कपिलवस्तु, जेठ १९ गते । कपिलवस्तुकी १७ वर्षीया किशाेरीकाे  अपहरणपछि बलात्कार गरेको आरोपमा ६ जना युवालाई प्रहरीले पक्राउ गरेको छ । मङ्गलवार राति ११ बजे सांस्कृतिक कार्यक्रम हेरेर घर फर्किँदै गर्दा किशाेरीकाे अपहरण गरेर जर्वजस्ती करणी गरेको आरोप लागेकाे जिल्ला प्रहरी कार्यालय कपिलवस्तुले जनाएको छ । 

रुपन्देही कन्चन गाउँपालिकाका युवाले मोटरसाइकल र स्कुटरको प्रयोग गरी अपहरण गरेको सूचना पाएपछि रातिदेखि प्रहरीले खोजतलास जारी गरेको थियो । अपहरणपछि कञ्चन गाउँपालिका-३ मा बालिकाको बलात्कार भएको नायव उपरीक्षक जेसी शाहले बताउनुभयो । 

घटनामा संलग्न कञ्चन गाउँपालिका ५ का नीरज कार्की, वडा नम्बर ४ का राहुल सिंजाली, सुलभ केसी, वडा नम्बर ३ का लक्ष्मण रसाइली, अमित कँडेल र गौरव थापालाई पक्राउ गरेर थप कारवाही अघि बढाइएको प्रहरीले जनाएको छ ।