खलङ्गा समाचारदाता
जाजरकोट, फागुन १८ गते । यहाँका गाउँबस्तीमा बालविवाह बढ्दै गएका छन् । प्रदेश सरकार अन्तर्गत सामाजिक विकास कार्यालय, स्थानीय सरकारले बालविवाह न्यूनीकरणका लागि अभियान सञ्चालन गरे पनि सार्थकता पाउन सकेको छैन । बालविवाह न्यूनीकरणका लागी स्थानीय तहले सचेतनामूलक कार्यक्रम सडक नाटक, बालविवाहबाट हुने बेफाइदाका बारेका प्रचारप्रसार गर्दै आए पनि बालविवाह घट्नुको साटो बढ्दै गएको पाइन्छ । कम उमेरमा गरेको विवाहले आमा र बच्चा रोगी हुने, परिवारमा द्वन्द्व सिर्जना, सम्बन्धविच्छेदका घटना बढ्दै गएपछि गाउँबस्तीमा बालविवाह न्यूनीकरणका लागि सञ्चालित अभियानले सार्थकता नपाउँदा सरोकारवाला चिन्तित भएका छन् ।
भेरी नगरपालिकाका वडाध्यक्ष वीरबहादुर चन्दका अनुसार गाउँबस्तीमा कम उमेरमा गरिने विवाहलाई न्यूनीकरण गर्न जनचेतनामूलक कार्यक्रम गरी विवाहपछि आउने समस्याका सुझावमूलक सन्देशसहित बालविवाहविरुद्ध सडक नाटक, सार्वजनिक स्थलमा होडिङ बोर्ड राखे पनि बालविवाह बढ्दै गएको बताउनुभयो । आमाबावु जिम्मेवार नबनेका कारण समस्या आउने गरेको छ । गरिबी, बेरोजगारी, अशिक्षा, आर्थिक अवस्था कमजोरीले बालविवाह न्यूनीकरण हुन नसकेको छैन ।
नागरिक समाजका संयोजक राजेन्द्रविक्रम शाहका अनुसार बालविवाहसम्बन्धी ऐन कानुनमा उल्लेख भएका कुरा ग्रामीण बस्तीका बालबालिकाले पाउन नसकेपछि समस्या बढ्दै गएको बताउनुभयो । जाजरकोटमा करिब ७५ प्रतिशत बालबालिकाले बालविवाह गर्ने गरेका छन् । जिल्ला प्रहरी कार्यालयका प्रमुख डिएसपी पुरुषोत्तमप्रसाद पाण्डले बालविवाहसम्बन्धी प्रहरीमा अहिलेसम्म उजुरी गर्न सर्वसाधारण नआएको बताउनुभयो ।
