हुम्ला समाचारदाता
हुम्ला, फागुन १८ गते । नयाँ शैक्षिक सत्रका लागि हुम्लाका सबै पालिकाका लागि किताब आइसकेका छन् । जनक शिक्षा सामग्री केन्द्रको नेपालगन्ज शाखाबाट पुस्तक ढुवानीको जिम्मा पाएको सप्लायर्सले पैदलमार्गबाट ढुवानी गरेर सबै गाउँपालिका केन्द्रमा किताब ल्याइसकेको हो ।
जनक शिक्षा सामग्री केन्द्र नेपालगन्जका प्रमुख हेमराज ढुङ्गेलले हुम्लाका सात वटै गाउँपालिकाका लागि पुस्तक लग्ने र गाउँपालिकामा पु¥याउने काम भएको बताउनुभयो । उहाँले हिमाली जिल्ला हुम्ला र डोल्पाका लागि पुस्तक बिक्री भइरहेको जनाउनुभयो ।
गाउँपालिकाका सबै विद्यालयका लागि पाठ्यपुस्तक आइपुगेको खार्पुनाथ गाउँपालिका शिक्षा शाखाका प्रमुख ललितजङ्ग शाहीले बताउनुभयो । उहाँले पनि पाठ्यपुस्तक गाउँपालिकामा आइपुगेसँगै विद्यालयलाई वितरण गरिसकिएको छ । खार्पुनाथमा १७ वटा सामुदायिक विद्यालय रहेका छन् ।
गाउँपालिकाका लागि पुस्तक ढुवानीको जिम्मा सुमन पुस्तक पसलले लिएको छ । माघ २० गतेबाट मसान्तसम्म भर्ना अभियान, फागुन ७ देखि १२ गतेसम्म पूरक परीक्षा र १३ र १४ गते पुस्तक वितरण गर्ने काम भएको छ ।
यसअघि सिमकोट र नाम्खा गाउँपालिकाका ३५ वटा सामुदायिक विद्यालयका लागि पुस्तक ढुवानीको जिम्मा लिएको रोकाया पुस्तक पसलका प्रतिनिधि ज्ञानबहादुर रोकायाले नयाँ शैक्षिक सत्र सुरु हुनुभन्दा एक हप्ताअघि नै पाठ्यपुस्तक सदरमुकाम सिमकोटमा पु¥याएर बिक्री सुरु गरिसक्नुभएको छ । रोकायाले यी दुई गाउँपालिकाका लागि कक्षा १, २ र ४ का लागि एक हजार ५५ सेट पुस्तक जिल्लामा ढुवानी गरेर ल्याउनुभएको थियो भने कक्षा ३, ५, ६, ७, ८, ९, १०, ११ र १२ का लागि एक हजार ९६० सेट पुस्तक ढुवानी गरेर ल्याइएको हो । सिमकोट गाउँपालिकाका विद्यालयमा फागुन १८ गतेबाट पठनपाठन सुरु हुँदै छ ।
सर्केगाड गाउँपालिकाका विद्यालयका लागि पुस्तक खरिद र ढुवानीको जिम्मा लिएको ज्ञानु बुक्स एन्ड स्टेसनरीका प्रतिनिधि मानदेव शाहीले पुस्तक खरिद गरेर गाउँपालिकामा आएको बताउनुभयो ।
सर्केगाड गाउँपालिकामा ३२ वटा विद्यालय रहेका छन् । त्यस्तै चङ्खेली, अदानचुली र ताँजाकोट गाउँपालिकाका ५७ वटा विद्यालयका लागि पनि पाठ्यपुस्तक खरिद गरेर गाउँपालिकामा पु¥याउने कार्य भएको एलबी सप्लायर्सका प्रतिनिधि लोकेन्द्र भण्डारीले बताउनुभयो ।
