हुम्लामा सवारी साधनलाई पार्किङकै समस्या

राजन रावत
हुम्ला, फागुन १८ गते । अनौपचारिक रुपमा सडक सञ्जाल जोडिएसँगै हुम्लामा सवारी साधनहरुलाई पार्किङमा समस्या देखिएको छ । साँघुरो सडक र पार्किङ स्थल समेत नभएका कारण सदरमुकाम सिमकोट भित्रिने यातायातका साधनलाई पार्किङमा समस्या देखिएको हो ।

बोलोरो जीप चालक पुरन रावतलाई यात्रु बोकेर सदरमुकाम सिमकोट आएपछि पार्किङ गर्न समस्या भएको बताउनुहुँदै यात्रु ओराल्ने वित्तिक्कै ट्राफिक प्रहरी गाडी हटाउन निर्देशन दिने गरेको गुनासो गर्नुभयो ।

यात्रुहरु झारेको दश मिनेटमा सडक छोडेर जानुपरेको उहाँले बताउनुभयो । पार्किङको समस्या नबुझेर धेरै समय सडकमा गाडी राखे ट्राफिकले चिट काट्ने गरेकोमा उहाँले दुःखेसो पोख्नुभयो । साँघुरो सडक त्यसमाथि पार्किङको व्यवस्था नभएका कारण दैनिक रुपमा गाडी भित्रिने क्रम बढी रहने भएकाले पार्किङको समस्या दैनिक थपिँदै गएको उहाँले बताउनुभयो । आन्तरिक र बाहिर सञ्चालन हुने बोलेरो जीप मात्र पचासभन्दा बढी रहेका छन् ।

अर्का ट्याक्टर चालक जग बुढामगरले ट्याक्टरलाई त झन समस्या भएको बताउनुभयो । सामान लोड भएर आएका ट्याक्टरलाई जति सक्दो चाँडो सामान अनलोड गरेर निस्कन ट्राफिकले उर्दी दिने गरेको उहाँको भनाइ छ । साघुरा सडकमा साना ठुला सवारी साधन पार्किङ हुन थालेपछि पैदल हिँड्ने यात्रुहरुलाई समेत सास्ती हुने गरेको छ । सडक साँघुरो निर्माण भएका कारण यातायातका साधनहरु चेपुवामा परेको उहाँले बताउनुभयो । ढलसहित सिमकोट बजारको सडक सात मिटर चौडा रहेको छ ।

जिल्ला ट्राफिक कार्यालयका ट्राफिक प्रहरी हवल्दार बसन्त केसीले साँघुरो सडक भएकाले पार्किङमा समस्या रहेको जानकारी दिनुभयो । उहाँले सडक निर्माण गर्दा ठाउँठाउँमा पार्किङको व्यवस्था नभएका कारण हाल समस्या भोग्नु परिरहेको बताउनुभयो । सडकमा यातायातका साधन पार्किङ गर्दा सडकको स्वरुप नै भद्रगोल देखिने भएका कारण सडकमा पार्किङ गर्न नपाइने नियम लागू गरिएको उहाँले बताउनुभयो । यसमा सवारी साधनको मात्र कमजोरी नभएको बताउदै उहाँले अब चाँडै पार्किङ स्थलको व्यवस्था गर्नुपर्ने जिकिर गर्नुभयो ।

सवारी साधनका धनिहरुले पनि आफ्नो साधनका लागि पार्किङको व्यवस्था अनिवार्य गर्नुपर्नेतर्फ ध्यान दिन आवश्यक रहेको उहाँको भनाइ छ । 

सिमकोट गाउँपालिकाका उपाध्यक्ष शुशिला भाम रोकायाले सिमकोटमा पार्किङ ठुलो समस्या रहेको बताउनुहुँदै अब सिमकोट गाउँपालिका मिनी बस पार्क निर्माण जुट्ने बताउनुभयो । हाल ठुला सवारी साधन  सामान अनलोड गर्ने वित्तिक्कै आफ्नो गन्तव्यमा निस्कने गरेको भए पनि साना भने कुना कुना पार्किङ गरेर राख्ने गरिएको छ ।