नवराज श्रेष्ठ
रामेछाप, फागुन १७ गते। प्रतिनिधि सभाका सभामुख देवराज घिमिरेले शिक्षा व्यावहारिक र जीवनोपयोगी हुनुपर्ने बताउनुभएको छ। शनिबार रामेछापको लिखु तामाकोसी गाउँपालिका–६ खिम्तीस्थित श्री मावि ज्यामिरेखानीको स्वर्ण महोत्सव कार्यक्रममा बोल्दै सभामुख घिमिरेले यस्तो बताउनुाभएको हो।
उहाँले भन्नुभयो, “शिक्षा समाज र व्यक्तिको जीवनमा सुधार ल्याउने खालको हुनुपर्छ।तर नेपालको शिक्षा यस्तो हुन सकेको छैन।नेपालको शिक्षा अहिले व्यक्तिको जीवन उपयोगी बनिरहेको छैन ।”
उहाँले प्राविधिक र गुणस्तरीय शिक्षा आजको आवश्यकता भएको पनि बताउनुभयो। अहिले संघीय संसदमा विद्यालय शिक्षा सम्बन्धी विधेयक छलफलमा रहेको बताउँदै सो ऐनले परिवर्तित राजनीतिक सन्दर्भलाई समेट्ने उनले विश्वास व्यक्त गर्नुभयो।घिमिरेले स्थानीय विशेषता र आवश्यकताका आधारमा विकासका काम अघि बढाउनु पर्नेमा जोड दिनुभयो।विकासमा राजनीतिक दल र नेताको भूमिका महत्त्पूर्ण हुने बताउँदै घिमिरेले त्यो भूमिका राजनीतिक दल र नेतृत्वबाट हुनुपर्ने बताउनुभयो।
कार्यक्रममा लिखु तामाकोसी गाउँपालिका अध्यक्ष केशव महतले समग्र गाउँपालिकाको शैक्षिक अवस्था बारे जानकारी गराउनुभएको थियो।गाउँपालिकाको विकास र समृद्धिमा सहयोगी भूमिका निर्वाह गरिदिन उहाँले सभामुखलाई अनुरोध पनि गर्नुभयो।
कार्यक्रममा वडाध्यक्ष शिवप्रसाद न्यौपानेले समग्र वडाको शिक्षा, भौतिक पूर्वाधार लगायतको अवस्था बारे जानकारी गराउँदै शिक्षा गुणस्तर सुधारका लागि शिक्षकले पाउने सेवा पनि सुधार हुनुपर्ने बताउनुभयो। विद्यालय व्यवस्थापन समिति अध्यक्ष भोजबहादुर थापा मगरको अध्यक्षतामा भएको कार्यक्रममा सभामुख घिमिरेले विद्यालयको मुख पत्र पनि विमोचन गर्नुभएको थियो।
