हुम्ला समाचारदाता
हुम्ला, फागुन ४ गते । राष्ट्रिय प्राकृतिक स्रोत तथा वित्त आयोगले सार्वजनिक गरेको आर्थिक वर्ष २०८०/८१ को कार्यसम्पादन मूल्याङ्कनमा कर्णाली प्रदेशमा हुम्लाको सिमकोट गाउँपालिका उत्कृष्ट ठहरिएको छ । स्थानीय तहको कार्यसम्पादन मूल्याङ्कन १७ वटा आधारमा गर्ने गरिएको छ । सबैभन्दा बढी अङ्क प्राप्त गर्दै सिमकोट गाउँपालिका उत्कृष्ट ठहरिएको हो ।
वित्त आयोगले सार्वजनिक गरेको कार्यसम्पादन मूल्याङ्कन विवरण अनुसार कर्णाली प्रदेशका ७९ स्थानीय तहमध्ये सिमकोट गाउँपालिका सबैभन्दा बढी अङ्क ल्याएर उत्कृष्ट भएको हो । कर्णाली प्रदेशका सबै स्थानीय तहमध्ये सिमकोट गाउँपालिकाले ७७ प्रतिशत अङ्क प्राप्त गरी पहिलो स्थानमा रहेको छ भने रुकुमपश्चिमको सानीभेरी गाउँपालिका ७२.७ अङ्क ल्याएर दोस्रो स्थानमा रहेको छ । हुम्ला जिल्लाकै खार्पुनाथ गाउँपालिकाले ७१.१ प्रतिशत अङ्क प्राप्त गरी तेस्रो स्थानमा रहेको छ ।
दैलेखको महाबु गाउँपालिकाले ६९.७ अङ्क प्राप्त गरी चौथो स्थान र सुर्खेतको गुर्भाकोट नगरपालिकाले ६८.९ प्रतिशत अङ्क प्राप्त गरी पाँचौँ स्थानमा रहेको छ । सबैभन्दा कम ३२.४ अङ्क दैलेखको भैरवी गाउँपालिकाले प्राप्त गरेको छ । वित्त आयोगले आर्थिक वर्षको राजस्व र आयव्ययको अनुमान समयमा गाउँ सभामा पेस गरे/नगरेको देखि समयमा बजेट पास भए/नभएको, स्थानीय तहले प्रदेश तथा सङ्घमा पठाउनुपर्ने राजस्व समयमा पठाए/नपठाएको हेर्ने गरिन्छ ।
शिक्षा, स्वास्थ्य, राजस्व तथा विद्यार्थी भर्ना, चालु तथा पुँजीगत खर्च, सुशासन, समन्वय, पूर्वाधार, न्यायिक कुरा पनि सूचकमा राखिएको हुन्छ । सिमकोट गाउँपालिकाका लेखा अधिकृत विशाल बोहोराले शिक्षा, स्वास्थ्य, कर्मचारी जनप्रतिनिधिका तालिमका कुरा पनि समेटिएको बताउनुभयो ।
नीति नियम, कानुनबमोजिम काम भए/भएको, बेरुजु न्यूनीकरणमा ध्यान दिनुपर्ने बताउँदै उहाँले शिक्षा र स्वास्थ्यमा उच्चतम प्रगति हासिल गर्ने र त्यसमा लगानी गर्दा उच्चतम नम्बर आउने बताउनुभयो । शिक्षा, स्वास्थ्यका अङ्कसँगै, भौतिक पूर्वाधार, लेखाका सूत्र प्रणाली, बेरुजु न्यूनीकरणलगायत ती सबैलाई समेटेर अङ्क प्राप्त गर्न सकिने उहाँले बताउनुभयो ।
आयोगले कार्यसम्पादन मूल्याङ्कन सुरु गरेयता सिमकोट गाउँपालिका पहिलो वर्ष कर्णाली प्रदेशमा प्रथम भएको थियो भने हुम्ला जिल्लाका स्थानीय तहमा भने तेस्रो पटक पहिलो भएको छ । यो कार्यमा उत्कृष्ट भएबापत् आयोगबाट ५० लाख रुपियाँ अनुदान पाउने व्यवस्था रहेको छ ।
