शिक्षा ऐन चाँडै बन्छ : गृहमन्त्री लेखक

अविनाश चौधरी

धनगढी, माघ २८ गते । गृहमन्त्री रमेश लेखकले संसदमा विचाराधीन अवस्थामा रहेको शिक्षा ऐन चाँडै बन्ने बताउनुभएको छ । निजी तथा आवासीय विद्यालय अर्गनाइजेसन (प्याब्सन) सुदूरपश्चिम समितिको चौथो अधिवेसनको सोमबार धनगढीमा उद्घाटन गर्नुहुँदै उहाँले यस्तो बताउनुभएको हो । 

गृहमन्त्री लेखकले शिक्षा ऐन आएपछि निजी, संस्थागत, आवासीय विद्यालयको सुरक्षा सरकारले गर्ने बताउनुभयो । उहाँले भन्नुभयो, “तपाईहरुको लगानी खेर जान दिइन्न । लगानीलाई सुरक्षित गरिन्छ । तपाईहरु पनि राम्रो हुँदै जानुपर्छ । तपाईहरुले आफै सुधार गर्नु भएन भने हस्तक्षेप गर्नुपर्ने ठाउँमा सरकार पुग्छ ।”

नेपालको शिक्षा क्षेत्रमा निजी, आवासीय तथा संस्थागत विद्यालयको महत्वपूर्ण योगदान रहेको लेखकको भनाइ थियो । उहाँले सामुदायिक विद्यालयलाई राम्रो बनाउने र निःशुल्क शिक्षा दिने काम सरकारको रहेको उल्लेख गर्दै संस्थागत, निजी र आवासीय विद्यालयका कारण सामुदायिक विद्यालयको स्तर नघटेको बताउनुभयो ।

उहाँले भन्नुभयो, “त्यसैले दुईटै किसिमको विद्यालयलाई जुधाउनुको कुनै औचित्य छैन । प्रतिस्पर्धा गराउने आवश्यकता पनि छैन ।” शिक्षामा निजी क्षेत्रको महत्वपूर्ण भूमिका रहेको भन्दै गृहमन्त्रीले यसको संरक्षण गर्ने कुरामा सरकार स्पष्ट रहेको बताउनुभयो । 

उहाँले कमीकमजोरी सबै क्षेत्रमा रहेको उल्लेख गर्नुहुँदै भएका विकृति विसंगतिलाई ठीक गर्नुपर्ने औंल्याउनुभयो । “तपाईहरु आफू पनि अनुशासित हुनुपर्छ । सरकारले पनि तद्अनुरुप अनुगमन, विश्लेषण गर्नुपर्छ”, उहाँले भन्नुभयो, “तर मार्न पाइदैन । त्यसले राम्रो गर्दैन ।”

उहाँले निजी, आवासीय विद्यालयमा भएको लगानीले शिक्षाको गुणस्तर वृद्धि गरेको बताउनुभयो । शिक्षाको गुणस्तर वृद्धिले हाम्रो जनशक्ति अन्तर्राष्ट्रिय जनशक्तिसँग प्रतिस्पर्धा गर्न तयार भएको लेखकको भनाइ छ । गृहमन्त्री लेखकले शिक्षा क्षेत्रमा मुलुक धेरै अगाडि बढेको बताउनुभयो । 

एक छुट्टै प्रसङ्गमा उहाँले सरकारले नीतिगत र कानुनी सुधारमा प्राथमिकता दिएको बताउनुभयो । यसैगरी, सुदूरपश्चिम प्रदेशका पूर्व मुख्यमन्त्री राजेन्द्रसिंह रावलले निजी विद्यालयले विद्यार्थी जनशक्ति र पुँजी पलायन रोक्ने काम गरेको बताउनुभयो ।