रुकुमपूर्व समाचारदाता
रुकुमपूर्व, माघ २४ गते । रुकुमपूर्वको भुमे गाउँपालिका–३ स्थित जितखोला–सीमा–झुम्लावाङ ग्रामीण सडक कालोपत्रेको काम सुरु गरिएको छ । यस गाउँपालिकाको ग्रामीण सडकमा यो सडकखण्ड पहिलो पटक कालोपत्रे हुन लागेको हो । मध्यपहाडी लोकमार्गबाहेक अन्य ग्रामीण सडक कालोपत्रे गरिएको छैन ।
भुमे गाउँपालिकामै पहिलो पटक ग्रामीण सडक कालोपत्रेको काम सुरु हुँदा स्थानीयले खुसी व्यक्त गरेका छन् । जितखोला–सीमा–झुम्लावाङ–राङ्सी ग्रामीण सडकखण्डको यस पटक जितखोला–सीमा–झुम्लावाङ खण्डको छ किलोमिटर सडक कालोपत्रे हुन लागेको भुमे–३ का वडाध्यक्ष पर्शुराम बुढामगरले जानकारी दिनुभयो । स्थानीय पूर्वाधार विभाग, ग्रामीण सडक सञ्जाल सुधार आयोजना (आरसिआइपी) को आयोजना र एसियाली विकास बैङ्कको आर्थिक सहयोगमा उक्त सडक कालोपत्रे हुने भएको वडाध्यक्ष बुढामगरले बताउनुभयो । दुई महिनाअघिदेखि कालोपत्रेका लागि सडक चौडा गर्ने र ग्याबिन वाल लगाउने काम भइरहेको उहाँले बताउनुभयो ।
सिसाघारी–सीमा–झुम्लावाङ–राङ्सी ग्रामीण सडकखण्ड कालोपत्रेको काम एनएनटी विकास प्रालि भारतले ठेक्का पाएको छ । २०८१ असार ३० मा कामको सम्झौता गरिएकोमा २०८३ असार ३० गतेसम्म सडक कालोपत्रे काम सक्ने गरी १५ करोड रुपियाँमा ठेक्का पाएको एनएनटी विकास प्रालि विहार इन्डियाका उज्जलप्रसाद न्यौपानेले जानकारी दिनुभयो । ग्रामीण सडकखण्ड कालोपत्रे भएपछि स्थानीयलाई आउजाउमा सहज हुनुका साथै कृषि उपज सजिलै बजारसम्म पुर्याउन सहज हुने भुमे गाउँपालिकाका अध्यक्ष होमप्रकाश श्रेष्ठले बताउनुभयो ।
