नवीनराज कुईकेल
लमजुङ, माघ २१ गते । नेपाल सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले सत्ता साझेदार दुई ठुला दलहरू नेपाली कांग्रेस र नेकपा (एमाले) मिल्दासम्म सरकारलाई केही नहुने बताउनुभएको छ । विपक्षी दलहरूले सरकार लामो समय जाँदैन भनेर दिइरहेका अभिव्यक्तिप्रति लक्षित गर्दै उहाँले सो कुरा बताउनुभएको हो ।
सोमबार लमजुङको मर्स्याङदी गाउँपालिका –८ सिमलचौरमा निर्मित भूमिगत सिँचाइ आयोजनाको उदघाटन गर्दै सञ्चारमन्त्री गुरूङले अस्थिर सरकार बन्दा मुलुकको व्यवस्थामाथि नै प्रश्न उठेपछि दुई ठुला दलहरू मिल्नुपरेको बताउनुभयो । ‘प्रचण्डजीले सरकार ढल्छ भन्नेकुरा, माधवजीले भन्नेकुरा, अरू साना दलहरू रास्वपा, राप्रपाले भन्नेकुरा बेकारका हुन, मन्त्री गुरूङले भन्नुभयो, ‘झिङ्गाको श्रापले डिङ्गा मर्दैन भन्छन नि त्यस्तै हो । उहाँहरूले भन्दैमा सरकारलाई केही हुनेवाला छैन ।’
सञ्चारमन्त्री गुरूङले पुराना ऐन कानुन, भ्रष्टाचार, कुशासन, अस्थिरता आदि कारणले देश थिलोथिलो भएकाले वर्तमान सरकारले सही दिशामा ल्याउन लागेको बताउनुभयो । सरकारले ६ महिनामा देशमा देखिएका विविध समस्या पहिचान गर्न सफल भएको र अध्यादेशमार्फत ऐन कानुन परिमार्जन गर्दै सुधार गर्न लागिएको बताउनुभयो ।
मन्त्री गुरूङले जिल्लाका सबै घरहरूमा टेलिफोन सेवा, गाउँ–गाउँमा रहेका प्रहरी चौकीहरू र वडा कार्यालयमा इन्टरनेट सेवा पुर्याउने प्रतिबध्दता जनाउनुभयो । ‘सञ्चारमन्त्री भएका नाताले म यति भन्छुकि तपाईंहरू सबैको घर–घरमा टेलिफोन सेवा दिनेछु । गाउँको प्रहरी चौकी र वडा कार्यालयमा इन्टरनेट पुगाएर डिजिटल सेवाको प्रबन्ध गर्छु, उहाँले भन्नुभयो ।
उहाँले सरकारको काम गाउँमा विकास ल्याउने भएको हुँदा जनताले पनि उत्पादन र व्यावसायिकतामा जोड दिनुपर्ने बताउनुभयो । ‘अब किसान गाउँमै आम्दानी बढाउन कृषिको आधुनिकीकरण र व्यावसायीकरणमा लाग्नुपर्छ’ उहाँले भन्नुभयो, ‘सरकारले तपाईंहरूकोमा बाटो, पुल, बिजुली, सिँचाइ, खानेपानीजस्ता विकास ल्याइदिन्छ ।’
मर्स्याङदी गाउँपालिकाका अध्यक्ष अर्जुन गुरूङले किसानलाई कृषिमा व्यावसायीकरण र आधुनिकीकरण गर्न सहयोग गर्न तयार रहेको बताउनुभयो । सिमलचौर सिँचाइ आयोजनाका अध्यक्ष कमान गुरूङले जलस्रोत तथा विकास डिभिजन कार्यालय लमजुङ र गाउँपालिकाको सभा करोड बढी सहयोगमा भुमिगत सिँचाइ आयोजना निर्माण गरिएको बताउनुभयो । सो सिँचाइ आयोजना बनेपछि हिउँदे तथा बर्खे खेती गर्न सजिलो भएको वडाध्यक्ष धनसिं तामाङले बताउनुभयो ।
