बसको ठक्करबाट महिलाको मृत्यु

रेखीराम राना

तानसेन, पुस २७ गते । पाल्पामा फोर्स बसको ठक्करबाट एक जना महिलाको मृत्यु भएको छ । मृत्यु हुनेमा तानसेन –११, सामाकोटका ४६ वर्षीया सीता गहतराज रहेको प्रहरीले जनाएको छ । 

तानसेन–तम्घास सडकखण्डको सामाकोट क्षेत्रको सडकमा हिँडिरहनुभएकी गहतराजलाई तानसेन हुँदै गुल्मीतर्फ जाँदै गरेको लु २ ख ५६१८ नम्बरको फोर्स बसले शनिबार बेलुकी ६ बजेतिर ठक्कर दिएको थियो । 

बसको ठक्करबाट गम्भीर घाइते हुनुभएकी गहतराजलाई उपचारका लागि लुम्विनी मेडिकल कलेज प्रभासमा ल्याइए पनि चिकित्सकले मृत घोषणा गरेका थिए । प्रहरीले बस र चालकलाई नियन्त्रणमा लिएको छ । घटनाबारे थप अनुसन्धान भइरहेको जिल्ला प्रहरी कार्यालय पाल्पाका प्रहरी निरीक्षक सन्दीप बेल्बासेले जानकारी दिनुभयो ।