सिराज खान
नेपालगन्ज, पुस २७ गते । बाँकेमा खोरेत रोग उन्मूलन गर्न एक लाख पशुलाई भ्याक्सिन लगाउन सुरु गरिएको भेटेरिनरी अस्पताल तथा पशु सेवा विज्ञ केन्द्र बाँकेले जनाएको छ ।
भेटेरिनरी अस्पताल तथा पशु सेवा विज्ञ केन्द्र बाँकेका प्रमुख कमला अधिकारीले बाँके जिल्ला पशुमा लाग्ने खोरेत रोगको उच्च जोखिममा रहेकोले ठुला पशुहरूमा खोरेत रोग लाग्न नदिन जिल्लाभरि नै खोरेत विरुद्धको भ्याक्सिन लगाउने कार्य शुरु गरिएको बताउनुभयो । उहाँले त्यसका लागि लुम्बिनी प्रदेश सरकारको खोरेतरोग उन्मूलन कार्यक्रम अन्तर्गत पशुहरूमा दिइने भ्याक्सिन डोजका बारेमा स्थानीय सरकारको पशुसेवा शाखा प्रमुख र भ्याक्सिनेटरको उपस्थितिमा बिज्ञ केन्द्रले अभिमुखिकरण कार्यक्रम गरेर सो बारेमा विस्तृत जानकारी गराइएको बताउनुभयो ।
विज्ञ केन्द्रका प्रमुख अधिकारीका अनुसार पशुहरूमा भ्याक्सिन लगाउनका लागि बाँकेका आठ पालिकाका ५९ जना भ्याक्सिनेटरलाई अभिमुखिकरण गरेर १५ दिनमा एक लाख पशुलाई भ्याक्सिन लगाई सक्नेगरी खटाइएको छ ।
खोरेत रोग लाग्न नदिने भ्याक्सिन लगाइएपछि त्यसबाट जिल्लामा रहेका पशुहरू स्वस्थ रहन मद्दत पुग्ने विश्वास लिइएको कार्यालय प्रमुख अधिकारीले बताउनुभयो । उहाँले खोरेत रोग लागेका पशुहरूमा मुख पाक्ने, खुट्टाको खुर पाक्ने अथवा घाउ हुने, ज्वरो आउने, दुब्लाउँदै जाने, खाना नखाने जस्ता लक्षण देखिने गरेको जनाउँदै बाँकेका विभिन्न पालिकाका पशुहरूमा यो रोग लाग्ने जोखिम अत्यधिक रहेकोले यो कार्यक्रम सुरु गरिएको बताउनुभयो ।
