गोरखापत्र समाचारदाता
काठमाडौँ, पुस २० गते । चलचित्र ‘११:५५’ (डु नट ट्रस्ट एनिवान) चैत ८ गतेदेखि प्रदर्शनमा आउने भएको छ । अङ्ग्रेजी नयाँ वर्षको अवसर पारेर निर्माण समूहले चलचित्रको फस्र्ट लुक पोस्टर सार्वजनिक गर्दै प्रदर्शन मिति सार्वजनिक गरेको हो ।
थ्रिलरमा निर्माण भएको चलचित्रको पोस्टरमा चलचित्रका मुख्य कलाकार महेश त्रिपाठी, सृष्टि श्रेष्ठ, करिष्मा श्रेष्ठ, एमएस अग्रज र सागर खनाललाई देखाइएको छ । खनालको यो पहिलो चलचित्र हो । केशव पाण्डेको ‘डेब्यु’ लेखन तथा निर्देशन रहेको चलचित्रमा अभिनेता बुद्धि तामाङ र विशाल पहारीको पनि अभिनय रहेको छ । अल्मोडा राना उप्रेतीको सङ्गीत, कविराज गहतराजको नृत्य निर्देशन, देव महर्जनको द्वन्द्व निर्देशन रहेको चलचित्रमा रामशरण उप्रेतीको छायाङ्कन रहेको छ ।
