आङ्खोपले जित्यो सङ्घीय मेला भलिबल उपाधि

चन्द्र पन्दाक

ताप्लेजुङ, पुस १९ गते। ताप्लेजुङको सिदिङ्वा गाउँपालिका-३ को आङ्खोप युवा क्लबले सङ्घीय मेला भलिबल उपाधि जितेको छ। सिदिङ्वाकै वडा ६ को मेहेले किङलाई पराजित गर्दै आङ्खोपले उपाधि जितेको हो। 

उपाधि जितसँगै आङ्खोपले ८१ हजार रुपियाँ नगद पुरस्कारसिहत ट्रफी, पदक र प्रमाणपत्र पाएको छ। उपविजेता बनेको मेहेहे किङले ४१ हजार रुपियाँ नगदमा चित्त बुझाउनुपरेको छ। यस्तै आयोजक टोली तृतीय बन्दै १५ हजार रुपियाँ सान्तवना पुरस्कार पाएको छ। 

गएको मङ्गलबारदेखि सुरु भएको भलिबल प्रतियोगितामा १२ टोली सहभागी भएका थिए। प्रतियोगिता शुक्रबार सम्पन्न भएको हो। सिरिजङ्घा गाउँपालिका–२ आम्बेगुदिनको खाम्दिमेमा आयोजित सङ्घीय मेलामा भलिबलसँगै नृत्य प्रतियोगितासमेत सम्पन्न भएको छ। 

नृत्य प्रतियोगितातर्फ भने स्थानीय डाँडागाउँ युवा क्लब विजेता र तेल्लोक स्पोर्टिङ क्लब उपविजेता बनेको आयोजक सङ्घीय खेलकुद तथा साँस्कृतिक युवा क्लबका सल्लाहकार रक्की थेबेले जानकारी दिनुभयो। मेलामा राष्ट्रिय कलाकार प्रमोद खरेल, कुशल थलङ, दीपा सुहाङ, प्रितिका बेघा लगायतको साङ्गीतिक प्रस्तुति रहेको थियो।