गोरखापत्र समाचारदाता
काठमाडौँ, पुस १८ गते । सञ्जय न्यौपानेको निर्देशनमा निर्माण भएको म्युजिक भिडियो ‘हारे हारे’ सार्वजनिक गरिएको छ । अङ्ग्रेजी नयाँ वर्षको अवसर पारेर बुधबार सार्वजनिक गरिएको म्युजिक भिडियोमा अभिनेतृ साम्राज्ञी राज्यलक्ष्मी शाह र विशाल खरेल प्रेमिल अवतारमा प्रस्तुत हुनुभएको छ । एलए स्टुडियो इन्टरटेनमेन्टको ब्यानरमा निर्माण भएको म्युजिक भिडियोमा नेपाल आइडल सिजन–२ बाट चर्चामा आउनुभएका सुमित पाठक र ममता गुरुङको स्वर सुन्न सकिन्छ । गीतको शब्द रचना, कम्पोज र एरेन्ज गायक पाठक स्वयंले गर्नुभएको छ । सौरभ लामाको छायाङ्कन रहेको म्युजिक भिडियोलाई निर्देशक न्यौपाने र कमल खतिवडाले निर्माण गर्नुभएको हो ।
