ललितपुर, पुस १४ गते । वन तथा वातावरणमन्त्री ऐनबहादुर शाही ठकुरीले सरकारले प्रकृतिको संरक्षण गर्ने जिम्मा लिएर काम गरिरहेको दाबी गर्नुभएको छ । आइतबार राष्ट्रिय प्रकृति संरक्षण कोषले ललितपुरमा आयोजना गरेको सदर चिडियाखानाको २९ औँ वार्षिकोत्सव समारोहलाई सम्बोधन गर्नुहुँदै मन्त्री ठकुरीले यस्तो दाबी गर्नुभएको हो ।
‘‘२९ वर्षमा सदर चिडियाखानाले वन्यजन्तुको व्यवस्थापन, संरक्षण, र आगन्तुकहरूलाई मनोरञ्जन प्रदान गर्न उल्लेखनीय भूमिका निर्वाह गर्दै आएको पाइएको छ । सदर चिडियाखानाको व्यवस्थापन कोषलाई हस्तान्तरण भएपश्चात वन्यजन्तुको संरक्षण, बासस्थानको पुनर्निर्माण गरिएको छ भने एम्बुलेन्सको व्यवस्था, दक्ष जनशक्तिसहितको अस्पताल समेत सञ्चालनमा आएको छ ।,’’ उहाँले भन्नुभयो, ‘‘वन्यजन्तुहरूलाई उपयुक्त पोषण र पोषणयुक्त दानापानीको समेत व्यवस्था हुँदै आएको छ । साथै वन्यजन्तु कल्याणकारी व्यवस्थापनलाई प्राथमिकामा राखेर विभिन्न कार्यहरू हुँदै छ ।’’
उहाँले जलवायु परिवर्तन र पर्यावरणको प्रभावलाई न्युनीकरण गर्ने काममा सरकार सक्रिय रहेको बताउनुभयो । उहाँले सदर चिडियाखानाले वन्यजन्तुको व्यवस्थापन र संरक्षणमा उल्लेखनीय भूमिका खेलेको भन्दै प्रशंसा गर्नुभयो ।
‘‘चिडियाखानामा वन्यजन्तुको उपचार र पुनःस्थापनामा समेत वन तथा वातावरण मन्त्रालय मातहतका विभिन्न निकायहरूसँग सहकार्य र समन्वय गरी उल्लेख्य भूमिका निर्वाह पनि गरेको छ । सदर चिडियाखानाले संरक्षण शिक्षाका लागि डिजिटल प्लेटफर्मसहितको संरक्षण शिक्षा सञ्चालनमा ल्याइएको छ । हालसम्म चिडियाखानाले पाँच सय वटा विद्यालयसँग संरक्षण शिक्षामा विविध कार्यहरू गर्दै सराहनीय कार्य गर्दै आएको छ ।,’’ मन्त्री शाहीले भन्नुभयो, ‘‘यसबाट फ्रेन्ड्स अफ जूका माध्यमबाट सम्बन्ध विस्तार गरेको देखिन्छ । आगन्तुकहरूका लागि भौतिक पूर्वाधार समेत धेरै हदसम्म व्यवस्थापन भएको पाइएको छ । समग्रमा चिडियाखाना हालको अवस्थामा आइपुग्दासम्मका लागि आर्थिक रूपमा सञ्चालनका दिगो र सफल रहेको देखिन्छ ।’’
उहाँले चिडियाखानाको व्यवस्थापन राष्ट्रिय प्राकृतिक संरक्षण कोषलाई हस्तान्तरण भएपश्चात वन्यजन्तुको संरक्षण, बासस्थानको पुनर्निर्माण, वन्यजन्तु अस्पताल र वन्यजन्तुका लागि पोषणयुक्त दानापानीको समेत व्यवस्था गर्न सफल भएको दाबी गर्नुभयो । कोषको अध्यक्ष समेत रहनुभएका उहाँले वन्यजन्तु संरक्षणका लागि सबैको समन्वय र सहकार्य आवश्यक रहेको बताउनुभयो ।
मन्त्री शाहीले भन्नुभयो, ‘‘नेपाल सरकार, वन तथा वातावरण मन्त्रालय र विषेश गरी राष्ट्रिय निकुञ्ज तथा वन्यजन्तु संरक्षण विभाग वन तथा भूसंरक्षण विभाग लगायतको उल्लेख्य भूमिका छ । बद्लिदो परिवेशमा हामीले नयाँ ढङ्गबाट काम गरिरहेको अवस्था छ । अहिले हामी प्रकृतिको संरक्षण गर्ने जिम्माका साथै जलवायु परिवर्तन र पर्यावरणको प्रभावलाई न्युनीकरण गर्ने लगायतका कामहरू समेत गरिरहेका छौं ।’’
उहाँले मानव र वन्यजन्तुबिचको द्वन्द्व न्युनीकरण गर्नका लागि चिडियाखानाहरूको महत्त्वपूर्ण भूमिका रहेको बताउनुभयो ।
