छविलाल पाण्डे
बुटवल, पुस ८ गते । लुम्बिनी प्रादेशिक अस्पताल बुटवलले छुट्टै प्रसूति सेवा शल्यक्रिया कक्ष निर्माण गरी सेवा सुरु गरेको छ । अस्पतालले प्रसूति सेवाका लागि छुट्टै शल्यक्रिया कक्ष सञ्चालनमा ल्याएपछि अब सातै दिन प्रसूति सेवा शल्यक्रियाको सुविधा उपलब्ध हुने भएको छ ।
शल्यक्रिया सेवा शुभारम्भका अवसरमा लुम्बिनी प्रदेशका स्वास्थ्य सचिव डा. वासुदेव उपाध्यायले प्रदेशमा मातृ मृत्युदर घटाउन विस्तारित अस्पताल सेवालाई प्राथमिकता दिइएको जानकारी दिनुभयो ।
उहाँले प्रसूति सेवाका लागि छुट्टै उपचार तथा शल्यक्रिया कक्षको व्यवस्थाका लागि स्वास्थ्य मन्त्रालयले लुम्बिनी प्रादेशिक अस्पताललाई रोजेको उल्लेख गर्नुभयो ।
अस्पतालमा सेवा विस्तारका लागि ५० लाख रुपियाँ बजेट व्यवस्था गरी अस्पतालमा रहेका उपकरणहरुको व्यवस्थापन तथा शल्यक्रिया कक्ष निर्माणमा सहयोग गरेको उहाँले जानकारी दिनुभयो ।
अस्पतालका मेडिकल सुपरिटेन्डेण्ट डा. इन्द्र ढकालले अस्पतालमा आठ शय्याको रिकभरी वार्ड तथा १५ शय्याको पोष्ट अपरेटिभ शय्यासहित नयाँ शल्यक्रिया कक्षको सेवा सञ्चालनमा आएको बताउनुभयो ।
उहाँले अब हप्ताको सातै दिन प्रसूति सेवातर्फ शल्यक्रिया सेवा उपलब्ध हुने बताउनुभयो ।
सञ्चालनमा ल्याइएको नयाँ शल्यक्रिया कक्षमा एउटा शल्यक्रिया कक्ष तथा दुईवटा ठुलो शल्यक्रिया कक्ष छ ।
मेसु ढकालले छुट्टै शल्यक्रिया कक्ष सञ्चालनसँगै प्रसुती सेवा थप गुणस्तरीय र सहज हुने बताउनुभयो ।
अस्पतालबाट वार्षिक नौ हजार बढी बिरामीले शल्यक्रिया सेवा लिँदै आएका छन् । अब प्रसूतिका लागि छुट्टै शल्यक्रिया कक्ष बनेपछि ३३ प्रतिशतले शल्यक्रिया सेवा वृद्धि हुने अस्पतालले जनाएको छ ।
अस्पतालमा शल्यक्रिया कक्ष विस्तार भएसँगै शल्यक्रिया गर्न महिनौ पालो कुर्नुपर्ने बाध्यता धेरै घटने अस्पतालको दाबी छ ।
अस्पतालका मेसु ढकालले अपरेशन थिएटर विस्तारसँगै विगतमा सातामा दुई दिन हुने हाडजोर्नी शल्यक्रिया अब सातामा तीन दिन हुने र सोही अनुसार नाक, कान, घाँटीसम्बन्धी शल्यक्रिया पनि सातामा तीन दिन हुने जानकारी दिनुभयो ।
अब वार्षिक १२ हजार बढीको सङ्ख्यामा शल्यक्रिया गर्न सकिने अस्पतालको भनाइ छ ।
अस्पतालका मेसु डा. ढकालले पर्याप्त संरचना, उपकरण तथा जनशक्ति नहुँदा तत्काल शल्यक्रिया गर्नुपर्ने बिरामी बाहेक अन्यलाई महिनौंपछि आउनेगरी पालो लगाउनुपर्ने बाध्यता अब हट्ने बताउनुभयो ।
अस्पताल विकास समिति सदस्य लक्ष्मी भट्टराईले प्रसूति सेवा विस्तारसँगै मातृ र शिशुको जीवन थप सुरक्षित हुने विश्वास व्यक्त गर्नुभयो ।
