ठगीमा संलग्न चार पक्राउ

रेखीराम राना

तानसेन, पुस ७ गते । ठगीमा संलग्न रहेको आरोपमा प्रहरीले चार जना युवालाई पक्राउ गरेको छ । सुनजस्तो पहेँलो धातु देखाएर सक्कली गरगहना ठगी गर्ने चार जना युवालाई जिल्ला प्रहरी कार्यालय पाल्पाले पक्राउ गरेको हो । 

जिल्लाको रैनादेवीछहरा –७, बल्ढेङ्गढीबाट रौतहट जिल्ला इशनाथ गाउँपालिका–२, का ३० वर्षीय अनिलकुमार शाह, सोही स्थानका २१ वर्षीय आशिक शाह, राकेश शाह, र कृष्ण शाहलाई पक्राउ गरिएको प्रहरीले जनाएको छ । 

शनिबार दिउँशो रैनादेवी छहरा–७, का ७८ वर्षीया डिलकुमारी बगालेको सुन सफा गर्ने बाहनामा दुई थान सक्कली सुनको रिङ् फुकाएर उनीहरू भागेका थिए । बगालेलाई नक्कली पहेँलो धातुको गहना थमाएर चार जना युवा फरार भएपछि प्रहरीले खोजी गरेको थियो । 

वृद्ध बगाले एक्लै घरमा भएको अवस्थामा सुनको गहना ठगेर ती युवा भागेको उजुरीका आधारमा उनीहरूलाई पक्राउ गरी अनुसन्धान अगाडि बढाइएको जिल्ला प्रहरी कार्यालय पाल्पाका सूचना अधिकारी सुनिल मल्लले जानकारी दिनुभयो ।