गोरखापत्र समाचारदाता
काठमाडौँ, पुस ७ गते । चलचित्र ‘द्रौपदी’ को पोस्टर सार्वजनिक भएको छ । चलचित्र डोल्पाको से फोक्सुन्डोलगायत विभिन्न रमणीय स्थलमा छायाङ्कन गरिएको हो । नेपालको वास्तविक सुन्दरता चलचित्रमा देखाउन खोजिएकाको लेखक तथा निर्देशक ऋषिराज आचार्यले बताउनुभयो । उहाँले चलचित्रको कथा महाभारतकी पात्र द्रौपदी या नेपालको कुनै कथा हो होइन भन्ने अहिले नै नखुल्याइएको पनि जानकारी दिनुभयो । चलचित्रमा आश्विनी शाही, रवि ओड, जेएलसन अधिकारी, सुजाता तिमल्सिना, कविराज भाम, प्रकाश ज्ञवाली, सीता बौडेल, विष्णु ठडराई, सुरज अधिकारीसँगै निर्देशक आचार्यको अभिनय रहेको छ । चलचित्रमा सङ्गीत रवि ओडको रहेको छ भने पार्श्व सङ्गीत सौरभ शर्मा बस्यालको दिनुभएको छ । मोहनकुमार झिल्लुको छायाङ्कन तथा अनिल महर्जनको सम्पादन रहेको चलचित्रमा विजय आचार्यले कला निर्देशन गर्नुभएको छ । ऋतु आचार्य सहनिर्माता रहनुभएको चलचित्रको मुख्य सहायक निर्देशक सुजाता तिमल्सिना र महेश्वर आचार्य हुनुहुन्छ । चलचित्रको निर्माण, कथा, पटकथा, संवाद, गीत, निर्देशक आचार्यकै रहेको छ ।
