केबलकार निर्माणको विषयमा ढुङ्गा हानाहान

चन्द्र पन्दाक

ताप्लेजुङ, कात्तिक २३ गते । ताप्लेजुङको पाथीभरा क्षेत्रमा केबलकार निर्माणको विषयलाई लिएर ढुङ्गा हानाहान भएको छ। केबलकार निर्माण पक्ष र विराेध गर्ने पक्षबिच ढुङ्गा हानाहान भएको हो । 

झडप हुँदा केबलकार निर्माणविरुद्ध रहेका चन्द्र मादेनसहित पाँच जना घाइते भएका छन् । झडपमा घाइते हुनेको जिल्ला अस्पताल ताप्लेजुङमा उपचार भइरहेको प्रहरीले जनाएको छ । दुई पक्षबिच झडप हुँदा ढुङ्गा लागेर सुरक्षाकर्मीसमेत सामान्य घाइते भएका छन् ।

निर्माण क्षेत्रमा एक्साभेटर मेशिन लैजाने क्रममा झडप भएको हो । केही समयको झडपपछि प्रहरीले स्थिति नियन्त्रणमा लिएको जिल्ला प्रहरी कार्यालयका प्रहरी निरीक्षक विवेक बस्नेतले जानकारी दिनुभयो । अहिले स्थिति सामान्य रहेको प्रहरी निरीक्षक बस्नेतले जानकारी दिनुभयो । केबलकार निर्माण स्थलमा नेपाल प्रहरी र सशस्त्र प्रहरी परिचालित छन् ।