रवीन्द्र उप्रेती
बर्दिबास, कात्तिक १६ गते । बर्दीबास नगरपालिका ५ स्थित सुदूरउत्तरी भेगमा पर्ने ढुङग्रे गढन्ताको एक पसलमा लक्ष्मीपूजाको राति आगलागी हुँदा लाखौ मूल्य बरावरको मालसामान खरानी भएको छ ।
स्थानीय नीरवहादुर भन्ने डम्वरवहादुर थापा मगरको एकतले घरमा सोही ठाउँका मोहन यादवले सञ्चालन गर्दैआएको पसलमा आगो लाग्दा १५ लाख रुपियाँ बराबरको क्षति भएको प्रहरीले जनाएको छ ।
आगोले ७ लाख मूल्य बरावरको घर र सो घरको पसलमा रहेका किराना, कस्मेटिक, खाधान्न, जुत्ताचप्पल लगायतका गरी करिव ८ लाख मूल्यका सामानहरु जलेको इलाका प्रहरी बर्दीबासका प्रहरी नायव उपरीक्षक रेवतीरमण पोखरेलले बताउनुभयो ।
आगोले सवै सामान खरानी बनाएपछि पीडित परिवारका सदस्यमा रुवावासी छ । खाने वस्ने सवै जलेपछि परिवार विच्चलीमा परेका हुन् । पीडित पसले यादवकी श्रीमती रविता देवीकाअनुसार आगोले पसलमा रहेको फ्रिज, रेडिमेड र थानका कपडाहरु, कस्मेटिक, खाधान्न लगायतका सामान जलेको छ ।
थापाको घरमा यादवले २ वर्षदेखि पसल गर्दै आउनु भएको थियो । पसलमा विधुत तार सर्ट भई आगो लागेको बताइएको छ । साँझ ७ बजेतिर सुरु भएको आगो बर्दीबासबाट पुगेको वारुण यन्त्र, प्रहरी र गाउँलेको सहयोगबाट साँझ साढे ८ बजेतिर मात्र आगो नियन्त्रणमा आएको बर्दीबास प्रहरीले जनाएको छ । घटनास्थल बर्दीबासदेखि करिव १० किमी पश्चिमउत्तरमा पर्छ ।
