बाजुरा समाचारदाता
बाजुरा, असोज ४ गते । विद्यालय पहिरोको जोखिममा परेपछि बाजुराको बडीमालिका नगरपालिका–७ जिल्लास्थित लक्ष्मी माविका विद्यार्थी यतिबेला अन्योलमा छन् । बर्खाको समयमा विद्यालयको चारैतिरबाट पहिरो जान थालेपछि विद्यार्थी पढ्न जाने कि नजाने भन्ने दोधारमा परेका छन् । विद्यालय जाऊँ पहिरोको डर, नजाऊँ पढाइ छुट्ने चिन्ता । लक्ष्मी माविका कक्षा १० का छात्रा रमिला विक भन्नुहुन्छ, “विद्यालय पहिरोको जोखिममा रहेदेखि विद्यालय जाने कि नजाने दोधारमा परेको छु ।” विद्यालयलाई वरिपरिबाट आएको पहिरोले निकै जोखिम पारेको छ । कुन दिन पढ्ने बेलामा नै विद्यालय पहिरोमा परिणत भएर पढ्दापढ्दै ज्यानै जाने हो की भन्ने डर रहेको उहाँको भनाइ छ । पहिरो विद्यालयनजिक पुगेको छ तर विद्यालय भने यसै ठाउँमा सञ्चालनमा छ ।
विद्यालय मार्तडी–कोल्टी सडकको छेउमा पर्छ । २०७८ साल असोज महिनामा डोजरले विद्यालयको नजिकको सडक मर्मत गरेपछि पहिरो जान सुरु भएको लक्ष्मी माविका प्रधानाध्यापक लालचन्द्र जैसीले बताउनुभयो ।
उहाँले भन्नुभयो, “विद्यालयमुनि पहिरो पुगेको छ । विद्यालय सञ्चालन गरौँ पहिरोको डर, नगरौँ बालबालिकाको पढाइ अवरोध हुने । यता सरोकारवाला निकायले पनि पढाइ गर्नुपर्ने भन्छन् । उता बालबालिकालाई केही भयो भने तिमीले नै जान्नुपर्ने अभिभावक भन्नुहुन्छ ।” विद्यालयको यो समस्यालाई स्थानीय, प्रदेश र सङ्घीय सरकारसँग कुरा राख्दै आएको भए पनि स्थानान्तरणका लागि कतैबाट केही सुनुवाइ नभएको प्रधानाध्यापक जैशीले बताउनुभयो ।
पछिल्लो समय हामीले वडा पालिकालाई त्यस विद्यालयको प्रहरीद्वारा मुचुल्का बनाएर नगरमा पठाइदिनु भनेका छौँ । त्यो प्रहरी मुचुल्का आएपछि भौतिक पूर्वाधारका लागि विभिन्न निकायमा पहल गर्ने बडीमालिका नरपालिका नगरप्रमुख अम्मर खड्काले बताउनुभयो । विकासका नाममा विद्यालय खानेपानीलगायतका भौतिक पूर्वाधारमा केही क्षति भएको भए त्यसको प्रहरीसहितको मुचुल्का र विद्यालयको सिफारिस ल्याए त्यसको क्षतिपूर्तिका लागि सम्बन्धित निकायमा पहल गर्ने पूर्वाधार विकास कार्यालय अछामका सूचना अधिकारी देविप्रसाद उपाध्यायले बताउनुभयो । विद्यालय पहिरोको जोखिममा रहेकाले त्यो विद्यालयलाई अन्य सुरक्षित स्थानमा सार्नुपर्नेमा सरोकारवालाले जोड दिएका छन् तर विद्यालयको आर्थिक अवस्था कमजोर भएका कारण सार्न नसकिएको विद्यालय व्यवस्थापनले समितिले जनाएको छ ।
