मुख्यमन्त्रीले विश्वासको मत लिने

मकवानपुर समाचारदाता

हेटौँडा, साउन १ गते । बागमती प्रदेशका मुख्यमन्त्री शालिकराम जम्कट्टेलले आगामी साउनको पहिलो साता बागमती प्रदेश सभाबाट विश्वासको मत लिने हुनुभएको छ ।

विश्वासको मत दिने प्रयोजनका लागि सोमबार नै मुख्यमन्त्री तथा मन्त्रीपरिषद् कार्यालयले प्रदेश सभा सचिवालयमा पत्र दर्ता गराएको छ । यसअघि सत्ता साझेदार दलसँग सोमबार यहाँ भएको छलफलपछि मुख्यमन्त्री जम्कट्टेलले आगामी साउन ६ गते विश्वासको मत लिने निर्णयमा पुग्नुभएको हो । 

विश्वासको मत लिने प्रयोजनका लागि मुख्यमन्त्री, मन्त्री तथा मन्त्रीपरिषद् कार्यालयबाट सोमबार प्रदेश सभा सचिवालयमा पत्र प्राप्त भएको बागमती प्रदेश सभा सचिवालयका प्रवक्ता मनोजकुमार गुप्ताले जानकारी दिनुभयो । उहाँका अनुसार साउन ६ गते आइतबार दिउँसो १ बजे विश्वासको मत लिने प्रयोजनका लागि समय व्यवस्थापन गरिदिन मुख्यमन्त्री कार्यालयबाट पत्र प्राप्त भएको छ । सत्ता गठबन्धनमा रहेको नेपाल कम्युनिस्ट पार्टी (एमाले) ले बागमती प्रदेश संसदीय दलले असार २४ गते प्रदेश सरकारलाई दिएको समर्थन फिर्तासँगै मुख्यमन्त्री जम्कट्टेल अल्पमतमा पर्नुभएको हो । एमालेका पाँच जना मन्त्रीले सामूहिक रूपमा राजीनामा दिएका थिए । 

१३ वटा मन्त्रालय रहेको बागमती प्रदेश सरकारमा हाल नेकपा (माओवादी केन्द्र) का मुख्यमन्त्रीसहित चार मन्त्री, नेकपा (एकीकृत समाजवादी) का तीन र हाम्रो नेपाली पार्टीका एक जना मन्त्री रहेका छन् । एमालेले सरकारलाई दिएको समर्थन फिर्ता लिएसँगै माओवादी केन्द्रका संसदीय दलका नेता जम्कट्टेललाई नेकपा (एकीकृत समाजवादी) र हाम्रो नेपाली पार्टीको मात्र साथ रहेको छ । सरकारमा रहेका दलहरू माओवादी केन्द्रको २१, एकीकृत समाजवादीको सात र हाम्रो नेपाली पार्टीको दुई जना प्रदेश सभा सदस्य छन् । प्रदेश सभाबाट गत चैतमा मुख्यमन्त्रीले ५६ जना प्रदेश सभा सदस्यको समर्थन प्राप्त गर्नुभएको थियो । 

चौथो पटक विश्वासको मत लिँदै

जम्कट्टेलले प्रदेश सभाका दुवै ठुला दल कांग्रेस र एमालेको पालैपालो समर्थन लिँदै मुख्यमन्त्रीमा निरन्तरता दिँदै आउनुभएको थियो । पछिल्लो पटक सङ्घमा दुई ठुला दल मिलेसँगै मुख्यमन्त्री जम्कट्टेलको सरकारसमेत अल्पमतमा परेको छ ।

योसहित मुख्यमन्त्री जम्कट्टेलले प्रदेश सभाबाट चौथो पटक विश्वासको मत लिनु हुनुभएको हो । २०७९ पुस २५ गते मुख्यमन्त्रीमा नियुक्त हुनुभएका जम्कट्टेलले यसअघि २०७९ माघ ३ गते,  २०७९ चैत १० गते र गत चैत १९ गते प्रदेश सभाबाट विश्वासको मत लिनुभएको थियो ।